پٹنہ ، 5/ مارچ (ایس او نیوز /ایجنسی)بہار کی سیاست میں ایک بڑے سیاسی الٹ پھیر کی آہٹ سنائی دے رہی ہے۔ اطلاعات کے مطابق ریاست کے چیف منسٹر نتیش کمار کو جنتا دل یونائیٹڈ کی جانب سے راجیہ سبھا بھیجے جانے کی تیاری کی جا رہی ہے۔ اگر ایسا ہوتا ہے تو ریاستی سیاست میں ایک نئی صف بندی سامنے آ سکتی ہے۔

ذرائع کے مطابق پٹنہ میں این ڈی اے کے ارکان اسمبلی کی اہم میٹنگ طلب کی گئی ہے، جس میں ممکنہ سیاسی فارمولے پر حتمی مہر لگ سکتی ہے۔اطلاعات کے مطابق نتیش کمار چیف منسٹر کا عہدہ چھوڑ کر قومی سیاست میں فعال کردار ادا کر سکتے ہیں۔ انہیں جے ڈی یو کے کوٹے سے راجیہ سبھا بھیجا جا سکتا ہے۔بہار میں راجیہ سبھا کی پانچ نشستوں پر انتخاب ہونا ہے۔ اگر نتیش کمار نامزد ہوتے ہیں تو وہ جلد ہی اپنا نامزدگی فارم داخل کر سکتے ہیں۔

پارٹی کی جانب سے باضابطہ اعلان کا انتظار کیا جا رہا ہے۔سیاسی مبصرین کے مطابق یہ قدم جے ڈی یو کی طویل مدتی حکمت عملی کا حصہ ہو سکتا ہے تاکہ مرکز میں پارٹی کی پوزیشن مضبوط کی جا سکے۔نتیش کمار کے ممکنہ طور پر دہلی جانے کی صورت میں ان کے بیٹے نشانت کمار  کو بہار کا ڈپٹی چیف منسٹر بنانے کی قیاس آرائیاں تیز ہو گئی ہیں۔جے ڈی یو کے کئی سینئر رہنما پہلے ہی نشانت کمار کی سیاست میں آمد کا خیرمقدم کر چکے ہیں۔ اسے نتیش کمار کی سیاسی وراثت کو اگلی نسل تک منتقل کرنے کی کوشش کے طور پر دیکھا جا رہا ہے۔

اگر یہ فارمولہ طے پاتا ہے تو بہار کی سیاست میں خاندانی جانشینی کا ایک نیا باب کھل سکتا ہے۔ذرائع کے مطابق اگر نتیش کمار دہلی منتقل ہوتے ہیں تو نئے اتحاد فارمولے کے تحت بی جے پی کو چیف منسٹر کا عہدہ مل سکتا ہے۔بی جے پی پہلے ہی راجیہ سبھا کے لیے اپنے دو امیدواروں کا اعلان کر چکی ہے :نیتن نبین پانچ بار ایم ایل اے رہ چکے ہیں اور بانکی پور اسمبلی حلقے کی نمائندگی کرتے رہے ہیں، جبکہ شیوش کمار رام پارٹی کے جنرل سیکریٹری ہیں اور سماجی توازن کو مدنظر رکھتے ہوئے انہیں موقع دیا گیا ہے۔

جے ڈی یو کے قومی کارگزار صدر سنجے جھا دہلی سے پٹنہ پہنچے اور انہوں نے نتیش کمار سے طویل ملاقات کی۔اسی طرح مرکزی وزیرراجیو رنجن سنگھ (للن سنگھ) کی پٹنہ آمد کو بھی اس سیاسی عمل کو حتمی شکل دینے کی کوشش سمجھا جا رہا ہے۔سیاسی حلقوں میں یہ تاثر پایا جا رہا ہے کہ این ڈی اے کی اعلیٰ قیادت اس ’ایگزٹ پلان‘ پر اتفاق رائے قائم کر چکی ہے۔

نتیش کمار گزشتہ دو دہائیوں سے بہار کی سیاست کے مرکزی کردار رہے ہیں۔ انہیں اکثر ریاستی سیاست کا ’چانکیہ‘ کہا جاتا ہے کیونکہ انہوں نے مختلف سیاسی اتحادوں کے ساتھ کامیاب حکمت عملی اپنائی ہے۔2025 کے اسمبلی انتخابات کے بعد این ڈی اے نے بھاری اکثریت سے حکومت بنائی تھی۔ ایسے میں اگر نتیش کمار مرکز کا رخ کرتے ہیں تو یہ قدم جے ڈی یو کے مستقبل کو محفوظ بنانے اور بی جے پی کے ساتھ تعلقات کو مزید مستحکم کرنے کی حکمت عملی سمجھا جا رہا ہے۔