بھٹکل، 21 نومبر (ایس او نیوز): بیلگاوی-پنجی قومی شاہراہ (NH-4A) پر جوئیڈا تعلقہ کے جلکٹی گاؤں کے قریب ہاتھی برج پر سڑک کے گڑھوں سے بچنے کی کوشش میں بے قابو ہونے والی کار نے موٹر سائیکل کو ٹکر مار دی، جس کے نتیجے میں 38 سالہ موٹر سائیکل سوار ہلاک ہوگیا۔ حادثے کا مقام بھٹکل سے تقریباً 200 کلومیٹر دور واقع ہے۔
متوفی کی شناخت اروند وٹھوبا کنکونکر کے طور پر کی گئی ہے۔
حادثہ 20 نومبر کو دوپہر تقریباً 2:50 بجے پیش آیا۔ بتایا گیا ہے کہ سڑک کے گڑھوں سے بچنے کی کوشش کے دوران کار بے قابو ہوگئی اور اس نے انموڈ سے رام نگر کی طرف آنے والی اروند کی موٹر سائیکل کو ٹکر مار دی۔ ٹکر کے نتیجے میں موٹر سائیکل سوار شاہراہ کی کنکریٹ حفاظتی دیوار سے ٹکرا کر تقریباً 40 فٹ گہری کھائی میں جا گرا۔
حادثے کے بعد اروند شدید زخمی ہوگیا اور اسے رام نگر کے سرکاری اسپتال منتقل کیا گیا، جہاں ڈاکٹروں نے اسے مردہ قرار دے دیا۔ ذرائع کے مطابق اروند اپنی بہن کو گوا چھوڑ کر رام نگر واپس جا رہا تھا۔
شکایت کی بنیاد پر رام نگر پولیس نے حادثے کے سلسلے میں مقدمہ درج کیا ہے۔ مزید تحقیقات جاری ہیں۔