نئی دہلی ، 15/ اپریل (ایس او نیوز /ایجنسی)پنجاب نیشنل بینک کے بدنام زمانہ گھوٹالے کا مرکزی کردار اور مفرور ہیروں کا سوداگر میہول چوکسی بالآخر قانون کی گرفت میں آ گیا ہے۔ سی بی آئی نے اسے بیلجیم میں گرفتار کر لیا ہے اور اب اس کی حوالگی کے لیے قانونی کارروائی جاری ہے تاکہ اسے ہندوستان لا کر انصاف کے کٹہرے میں کھڑا کیا جا سکے۔
سرکاری ذرائع کے مطابق، مفرور ہیروں کے تاجر میہول چوکسی کو 13,000 کروڑ روپے کے PNB بینک قرض 'فراڈ' کیس میں مبینہ طور پر ملوث ہونے کے الزام میں ہندوستانی تفتیشی ایجنسیوں کی حوالگی کی درخواست کے بعد بیلجیم میں حراست میں لیا گیا۔
ہفتہ کو ہیروں کے تاجر کے خلاف یہ کارروائی کی گئی۔ ذرائع نے بتایا کہ ہندوستانی ایجنسیاں، انفورسمنٹ ڈائریکٹوریٹ (ای ڈی) اور سی بی آئی، ان کی گرفتاری کے لیے انٹرپول کے ریڈ نوٹس کو خارج کیے جانے کے بعد بیلجیم سے ان کی حوالگی کے لیے کارروائی تیز ہوگئی ہے۔
چوکسی، اس کے بھتیجے اور مفرور ہیروں کے تاجر نیرو مودی اور ان کے خاندان کے افراد اور ملازمین، بینک کے افسران اور دیگر کے خلاف 2018 میں دونوں ایجنسیوں نے ممبئی میں PNB کی بریڈی ہاؤس برانچ میں مبینہ طور پر قرض کی دھوکہ دہی کے الزام میں مقدمہ درج کیا تھا۔
ای ڈی نے الزام لگایا کہ چوکسی، اس کی کمپنی گیتانجلی جیمز اور دیگر نے بینک کے بعض عہدیداروں کے ساتھ مل کر پنجاب نیشنل بینک کے خلاف دھوکہ دہی کا جرم کیا۔ اس کے تحت ایل او یو (لیٹرز آف انڈرٹیکنگ) دھوکہ دہی سے جاری کیے گئے اور طے شدہ طریقۂ کار پر عمل کیے بغیر ایف ایل سی (فارن لیٹرز آف کریڈٹ) میں اضافہ کیا گیا اور غلط طریقے سے بینک کو نقصان پہنچایا گیا۔ ای ڈی نے اب تک چوکسی کے خلاف تین چارج شیٹ داخل کی ہیں۔ سی بی آئی نے بھی ان کے خلاف اسی طرح کی چارج شیٹ داخل کی ہے۔