مینگلور 29/جولائی (ایس او نیوز) دھرمستھلا اجتماعی تدفین کیس کے سلسلے میں منگل کے روز شکایت کنندہ گواہ کی نشاندہی پر قبریں کھودنے کا عمل شروع کیا گیا۔ موسلا دھار بارش کے باوجود، سات سے آٹھ مزدوروں پر مشتمل ایک ٹیم نے دریائے نترواوتی کے قریب جنگلاتی علاقے میں دھرمستھلا باتھنگ گھاٹ کے پاس کھدائی کا آغاز کیا، جہاں لاشوں کے دفن ہونے کا شبہ ہے۔
شکایت کنندہ گواہ، جس نے اپنا چہرہ ڈھانپ رکھا تھا، خصوصی تحقیقاتی ٹیم (SIT) کے افسران کے ہمراہ موقع پر موجود تھا۔ ان افسران میں انٹرنل سیکیورٹی ڈویژن کے ایس پی جیتندر کمار دیاما، پتور کی اے سی اسٹیلا ورگیز اور بلتھنگڈی کے تحصیلدار پرتھوی سانیکم شامل تھے۔ ان کے ساتھ کرائم سین آفیسرز اور فورینسک سائنس لیبارٹری کے ماہرین بھی موجود تھے، جب کہ ایک قانونی ٹیم بھی شکایت کنندہ گواہ کے ہمراہ موقع پر پہنچی۔
SIT اہلکار اس پورے قبرکشائی کے عمل کی ویڈیو ریکارڈنگ بھی کر رہے ہیں۔ اس عمل سے قبل بلتھنگڈی میں SIT کے دفتر میں ڈپٹی انسپکٹر جنرل ایم این انوچیت کی قیادت میں ایک اہم اجلاس منعقد ہوا، جس میں آئندہ تحقیقاتی مراحل پر غور کیا گیا۔
پیر کے روز گواہ نے SIT افسران کو نتیراوتی باتھنگ گھاٹ کے قریب 13 مقامات کی نشاندہی کی تھی۔ ان مقامات کو جیو ٹیگ کیا گیا اور بیریئر ٹیپ کے ساتھ سلسلہ وار نمبروں سے نشان زد کیا گیا۔
مشکوک مقامات کے آس پاس مسلح پولیس اہلکاروں کو تعینات کیا گیا ہے۔ اس آپریشن کی سیکیورٹی کے لیے گڑودا فورس اور اسپیشل ایکشن فورس کے افسران و اہلکار تعینات کیے گئے ہیں، جبکہ KSRP (کرناٹک اسٹیٹ ریزرو پولیس) کے اہلکار بھی موقع پر موجود تھے۔
Related News:
دھرمستھلا میں متعدد لاشوں کا معاملہ : آگے بڑھتی ہوئی تحقیقات - شکایت کنندہ نے کی مختلف مشتبہ مقامات کی نشاندہی
دھرمستھلا میں پراسرار لاشوں کا معاملہ : ایس آئی ٹی نے شروع کی جانچ