کاروار، 18 /اگست (ایس او نیوز)ضلع میں ممکنہ لینڈ سلائیڈنگ والے علاقوں میں مٹی کے تودے گرنے سے روکنے کے لیے 100 کروڑ روپے کی لاگت سے جاری کاموں کو جلد مکمل کرنے کی ہدایت ڈپٹی کمشنر کے لکشمی پریا نے دی۔
وہ منگل کو ڈپٹی کمشنر دفتر کے کانفرنس ہال میں منعقدہ ضلعی آفات سے نمٹنے کی اتھارٹی کے اجلاس کی صدارت کرتے ہوئے خطاب کر رہی تھیں۔
انہوں نے بتایا کہ ضلع کے مختلف علاقوں میں لینڈ سلائیڈنگ کی روک تھام کے لیے 100 کروڑ روپے کی لاگت سے 99 کاموں کی منظوری دی گئی ہے۔ تمام کاموں کے لیے ٹینڈر کا عمل بھی مکمل ہوچکا ہے، جبکہ 80 کاموں کے لیے ورک آرڈر جاری کیے جاچکے ہیں۔ انہوں نے متعلقہ افسران کو ہدایت دی کہ ان کاموں کو مقررہ مدت میں مکمل کیا جائے۔
ڈپٹی کمشنر نے 19 کاموں کے ابھی تک شروع نہ ہونے پر سخت ناراضگی کا اظہار کرتے ہوئے متعلقہ محکمہ کے افسران سے اس بارے میں مناسب وضاحت طلب کی۔ انہوں نے ورک آرڈر جاری کیے جاچکے کاموں کی اب تک کی پیش رفت کی رپورٹ پیش کرنے کی بھی ہدایت دی۔
انہوں نے کہا کہ ورک آرڈر جاری ہونے کے بعد کسی بھی صورت میں کاموں میں تاخیر نہیں ہونی چاہیے۔ متعلقہ عمل درآمد کرنے والے محکمے مقررہ مدت کے اندر تمام کام مکمل کرنے کے لیے ضروری احتیاطی اقدامات کریں۔
ضلع میں بارش ناپنے والے آلات کی دیکھ بھال کے سلسلے میں ڈپٹی کمشنر نے ریاستی حکومت کی جانب سے اس کام کا ٹھیکہ حاصل کرنے والی ایجنسی کے افسران کے ساتھ تال میل قائم کرنے کی ہدایت دی۔ انہوں نے تمام بارش ناپنے والے آلات کے درست طریقے سے کام کرنے کو یقینی بنانے کے لیے ان کی جانچ کرنے پر بھی زور دیا۔
ڈپٹی کمشنر نے شیروڑ کے قریب گنگاولی ندی میں جمع مٹی کو نکالنے کے کام میں تیزی لانے اور اسے جلد مکمل کرنے کی ہدایت بھی دی۔ اس موقع پر بندرگاہ محکمہ کے افسران نے بتایا کہ مٹی نکالنے کا کام تین ماہ کے اندر مکمل کرلیا جائے گا۔
اجلاس میں ضلع پنچایت کے چیف ایگزیکٹیو آفیسر ڈاکٹر دلیش ششی نے ورچوئل طور پر شرکت کی۔ ایڈیشنل ڈپٹی کمشنر ساجد ملا، ایڈیشنل سپرنٹنڈنٹ آف پولیس کرشنامورتی، ضلع پنچایت کے چیف پلاننگ آفیسر سوم شیکھر میستا سمیت مختلف محکموں کے افسران موجود تھے۔