ہُبلی 13 اپریل (ایس او نیوز) - ریاست کرناٹک کے ہبلی میں پانچ سالہ بچی کو اغوا کرنے کےبعد زیادتی کی کوشش پھر اس کا بے رحمانہ قتل کرنے والے ملزم کو پولیس نے انکاونٹر کے ذریعے ہلاک کردیا۔ ملزم کی شناخت 35 سالہ رتیش کمار کی حیثیت سے کی گئی ہے جس کا تعلق بہار سے تھا۔ پولس ذرائع کے مطابق وہ گرفتاری سے بچنے کی کوشش میں، پولس کی گولی لگنے سے ہلاک ہوگیا۔
بچی کو اغوا کرنے اورپھر اُس کا قتل کرنے جیسے گھناؤنے جرم کے بعد شہر میں بڑے پیمانے پر غم کا غصہ پھوٹ پڑا اور لوگ احتجاج پرآترآئے تھے۔ اطلاعات کے مطابق یہ واقعہ اتوار، 13 اپریل 2025 کو پیش آیا۔
ہُبلی پولیس نے ملزم کو پکڑنے کے لیے سی سی ٹی وی فوٹیج کی بنیاد پر متعدد ٹیمیں تشکیل دیں۔ ابتدائی اطلاعات سے پتہ چلتا ہے کہ رتیش کمار نے مبینہ طور پر لڑکی کو اغوا کیا اور اسے ایک جھونپڑی میں لے گیا۔ جب بچی نے چیخنا شروع کیا تو قریبی لوگ جمع ہو گئے جس کے دوران ملزم نے فرار ہونے کی کوشش میں مبینہ طور پر لڑکی کو قتل کر دیا۔
جب پولیس نے رتیش کمار کو ڈھونڈا اور اسے پکڑنے کی کوشش کی تو اس نے مبینہ طور پر افسران پر حملہ کیا۔ دفاع میں پولیس نے فائرنگ کی جس سے اس کی ٹانگ اور سینے میں گولیاں لگیں۔ اسے فوری طور پر ڈسٹرکٹ ہسپتال لے جایا گیا جہاں ڈاکٹروں نے اسے مردہ قرار دے دیا۔
معصوم بچی کے ساتھ المناک واقعہ اُس وقت پیش آیا جب مقتولہ کے والد کام پر گئے ہوئے تھے اور والدہ گھر کے اندر مصروف تھیں۔ بتایا جاتا ہے کہ رتیش کمار نے بچی کو چاکلیٹ کا لالچ دے کر اغوا کیا۔ اس کی نقل و حرکت سی سی ٹی وی کیمروں میں قید ہو گئی۔ لڑکی کے لاپتہ ہونے پر اس کی والدہ اور مقامی باشندوں نے مل کر تلاش شروع کی۔ مقتولہ کے والدین جن کا تعلق اصل میں کوپل سے تھا، پینٹنگ کے کام کے سلسلے میں ہُبلی میں تھے۔ بچی کی لاش ایک زیر تعمیر عمارت میں غیر استعمال شدہ بیت الخلا سے برآمد ہوئی۔
لاش کی دریافت کے بعد بڑے پیمانے پرعوام کاغصہ پھوٹ پڑا۔ مقامی لوگوں کی ایک بڑی تعداد خاص طور پر خواتین نے اشوک نگر پولیس اسٹیشن کے سامنے زبردست احتجاج کیا۔ سٹی پولیس کمشنر این ششی کمار سمیت سینئر پولیس افسران نے مشتعل ہجوم کو پرسکون کرنے کے لیے اسٹیشن پہنچ گئے۔ مقامی لوگوں نے مبینہ طور پر سی سی ٹی وی فوٹیج کے ذریعے ملزم کی شناخت کی تھی جس کی وجہ سے پولیس نے کارروائی کی۔ سابق ایم پی آئی جی سنادی، ہبلی-دھارواڑ اربن ڈیولپمنٹ اتھارٹی کے چیئرمین ساکیر سنادی، کارپوریٹرز سنتوش چوہان اور نرنجن ہیرمٹھ اور سابق کارپوریٹر سدو موگلی شیٹر بھی احتجاج میں شامل تھے۔
پولیس انکاونٹر کے تعلق سے ابتدائی طور پر متضاد اطلاعات سامنے آئیں۔ ایک بیان میں کہا گیا ہے کہ انکاونٹر، گرفتاری کی کوشش کے دوران اُس وقت ہوا جب ملزم نے پولیس پر حملہ کیا۔ ایک اور رپورٹ میں بتایا گیا ہے کہ یہ واقعہ اس وقت پیش آیا جب پولیس ملزم کو اس کی رہائش گاہ کا معائنہ کرنے کے لیے لے جا رہی تھی۔ ذرائع نے دعویٰ کیا کہ رتیش کمار نے فرار ہونے کی کوشش کی اور پولیس افسران پر حملہ کیا جس کے بعد پولیس نے بار بار انتباہ کرنے کے بعد دفاع میں فائرنگ کی۔
پولیس کی کارروائی پر ملے جلے ردعمل سامنے آئے ہیں۔ مقامی قانون ساز پرساد ابیا نے پولیس مقابلے کی تعریف کرتے ہوئے کہا کہ خاتون پی ایس آئی نے ایک ایسے مجرم کے خلاف دفاعی کارروائی کی جس نے ایک گھناؤنا جرم کیا تھا اور پھر پولیس پر حملہ کیا تھا۔
تاہم، متعدد محلوں کے رہائشیوں نے اشوک نگر پولیس اسٹیشن پر احتجاج جاری رکھا۔ کارپوریٹر سنتوش چوہان اور بی جے پی کے رہنماؤں سدو موگلیشیٹر اور ایشور گوڈا پاٹل کی قیادت میں مظاہرین نے پولیس کے خلاف غصے کا اظہار کیا۔ انہوں نے مطالبہ کیا کہ ملزم کو قانونی کارروائی کے بجائے ان کے سامنے موت کے گھاٹ اُتار دیا جائے یہاں تک کہ انہوں نے پولیس سے اسے "مناسب سزا" کے لیے ان کے حوالے کرنے کا بھی مطالبہ کیا۔ پولیس کمشنر اور دیگر افسران کی جانب سے مظاہرین کو پرسکون کرنے کی ابتدائی کوششیں ناکام رہیں۔
خواتین تنظیموں نے بھی احتجاج میں شرکت کی اور پولیس اسٹیشن پر دھاوا بولنے کی کوشش کی جس سے پولس اور مظاہرین کے درمیان زبانی جھڑپیں ہوئیں اور کشیدہ صورتحال پیدا ہو گئی۔ پولیس کمشنر این ششی کمار نے مظاہرین سے اپیل کی کہ وہ قانونی عمل کو آگے بڑھنے دیں اور انہیں یقین دلایا کہ ضروری کارروائی کی جائے گی۔ تاہم مظاہرین نے فوری طور پر کی جانے والی مخصوص قانونی کارروائیوں کے بارے میں جاننے پر اصرار کیا۔
جیسے ہی اس واقعے کی خبر پھیلی دلت حقوق گروپوں، حامی کنڑ تنظیموں اور آٹو ڈرائیور یونینوں سمیت مختلف تنظیموں نے پولیس اسٹیشن کی طرف ریلیاں نکالتے ہوئے احتجاج میں شرکت کی۔ کچھ مظاہرین نے ٹائر بھی جلا دیے جس پر پولیس نے شعلوں کو بجھانے اور ہجوم کو منتشر کرنے کی کوشش کی۔ سینئر پولیس افسران کی بار بار کوششوں کے باوجود مظاہرین بضد رہے۔
بالآخر مقامی ایم ایل اے مہیش ٹینگینکائی نے مداخلت کی اور مظاہرین سے اپنا احتجاج واپس لینے کی اپیل کی۔ انہوں نے انہیں یقین دلایا کہ پولیس نے دو دن کے اندر سخت قانونی کارروائی کرنے کا وعدہ کیا ہے اور وہ ضروری اقدامات کو یقینی بنانے کے لیے وزیر اعلیٰ سے اس معاملے پر بات کریں گے۔ انہوں نے ان سے درخواست کی کہ وہ اس وقت تک قانونی عمل کو آگے بڑھنے دیں جس میں ناکامی کی صورت میں وہ اپنا احتجاج دوبارہ شروع کر سکتے ہیں۔ ان کی یقین دہانیوں کے بعد مظاہرین نے شام تک اپنا مظاہرہ ختم کرنے پر اتفاق کیا۔
مگر رات ہونے تک اطلاع ملی کہ ملزم کو پولس نے انکاونٹر کے ذریعے ہلاک کردیا ہے۔