غازی آباد ، 4/ فروری (ایس او نیوز ) اتر پردیش کے شہر غازی آباد سے ایک انتہائی افسوسناک خبر سامنے آئی ہے، جہاں لونی کے علاقے میں واقع 'بھارت سٹی سوسائٹی' میں تین کمسن بہنوں نے نویں منزل سے چھلانگ لگا کر اپنی زندگی کا خاتمہ کر لیا۔

جاں بحق ہونے والی بہنوں کی شناخت 16 سالہ نشیکا، 14 سالہ پراچی اور 12 سالہ پاکھی کے نام سے ہوئی ہے۔

​میڈیا رپورٹوں کے مطابق ابتدائی تحقیقات سے پتہ چلا ہے کہ یہ بچیاں کوریائی ثقافت (Korean culture) کی دیوانی تھیں اور ایک آن لائن "لو گیم" (love game) کی عادی ہو چکی تھیں۔

​ان کے والد کے مطابق، گھر والوں نے موبائل فون کے زیادہ استعمال پر پابندی لگائی تھی، جس سے دلبرداشتہ ہو کر انہوں نے یہ انتہائی قدم اٹھایا۔

پولیس کو ان کے کمرے سے ایک ڈائری ملی ہے جس میں انہوں نے کوریائی زبان اور ثقافت سے اپنی وابستگی کا اظہار کیا اور والد سے معافی مانگی۔

​پولیس اس معاملے کی مزید تفتیش کر رہی ہے اور ان کے موبائل فونز کی جانچ پڑتال کی جا رہی ہے تاکہ اس خطرناک گیم یا گروہ کا پتہ لگایا جا سکے۔