گیمبیا 16/اکتوبر (ایس او نیوز/ایجنسی) مغربی افریقی ملک گیمبیا کے ساحل کے قریب بحرِ اوقیانوس میں تارکینِ وطن کو لے جانے والی ایک کشتی ڈوبنے سے کم از کم 12 افراد ہلاک ہوگئے، جبکہ متعدد دیگر کے لاپتہ ہونے کا خدشہ ہے۔ گیمبیا ریڈ کراس سوسائٹی کے مطابق، امدادی کارکنوں نے اب تک 12 لاشیں برآمد کی ہیں، تاہم لاپتہ افراد کی صحیح تعداد معلوم نہیں ہوسکی ہے۔ تلاش اور امدادی کارروائیاں جاری ہیں۔
یہ واقعہ گیمبیا کے شمالی بینک ریجن میں جینیک کجاتا (Jinack Kajata) کے ساحل کے قریب پیش آیا۔ بین الاقوامی خبر رساں اداروں کی رپورٹس کے مطابق، کشتی یہاں سے یورپ، بالخصوص اسپین کے کینری جزائر پہنچنے کی کوشش کرنے والے تارکینِ وطن کو لے کر روانہ ہوئی تھی۔ گیمبیا ریڈ کراس نے کہا ہے کہ وہ صورتِ حال سے نمٹنے کے لیے متعلقہ حکام اور امدادی اداروں کے ساتھ مل کر کام کر رہی ہے۔
ریڈ کراس کے مطابق، لاپتہ افراد کی تعداد کے بارے میں فی الحال کوئی حتمی اطلاع نہیں ہے۔ برآمد ہونے والی لاشوں کی شناخت اور کشتی میں سوار افراد کی مجموعی تعداد بھی ابتدائی رپورٹس میں واضح نہیں کی گئی ہے۔
میڈیا رپورٹوں کے مطابق جنیک کجاتا کا علاقہ مغربی افریقہ سے اسپین کے کینری جزائر جانے کی کوشش کرنے والے تارکینِ وطن کے لیے ایک اہم مقام بنتا جا رہا ہے۔ اس راستے پر سفر کرنے والی کشتیوں کو تیز سمندری لہروں، طاقتور بحری روؤں اور اکثر خستہ حال یا ضرورت سے زیادہ بھری ہوئی کشتیوں کے باعث شدید خطرات لاحق رہتے ہیں۔
خبر رساں ادارے اے ایف پی کی رپورٹ کے مطابق، مراکش، موریطانیہ اور سینیگال کے ساحلی علاقوں میں نگرانی سخت کیے جانے کے بعد بعض تارکینِ وطن اب گیمبیا جیسے مزید جنوبی علاقوں سے سفر کرنے کی کوشش کر رہے ہیں۔ اس تبدیلی سے یورپ تک پہنچنے کا سمندری سفر طویل اور زیادہ خطرناک ہوسکتا ہے۔
یورپی خبر رساں ادارے یورونیوز نے بین الاقوامی تنظیم برائے مہاجرت (IOM) کے اعداد و شمار کا حوالہ دیتے ہوئے بتایا کہ کینری جزائر پہنچنے والوں کی تعداد 2024 کے مقابلے میں 2025 میں 62 فیصد کم ہوئی، لیکن بحرِ اوقیانوس کے اس راستے پر اموات اور لاپتہ ہونے کے واقعات میں اسی تناسب سے کمی نہیں آئی۔ تنظیم کے مطابق، 2024 میں 1,215 کے مقابلے میں 2025 میں 1,172 افراد ہلاک یا لاپتہ ریکارڈ کیے گئے۔
اس سے قبل دسمبر 2025 کے آخر میں بھی گیمبیا کے جنیک علاقے سے روانہ ہونے والی ایک کشتی حادثے کا شکار ہوئی تھی۔ اے ایف پی کی رپورٹ کے مطابق، اس سانحے میں 40 سے زائد افراد کی موت ہوئی اور تقریباً 100 افراد لاپتہ ہوگئے تھے۔