دبئی  ، 19/فروری (ایس او نیوز/ایجنسی )ہندوستانی ٹیم کے نوجوان سلامی بلے باز شبھمن گل نے یک روزہ کرکٹ کی آئی سی سی رینکنگ میں اپنی بہترین کارکردگی کا مظاہرہ کرتے ہوئے پہلی پوزیشن حاصل کر لی ہے۔ انہوں نے پاکستانی کپتان بابر اعظم کو پیچھے چھوڑتے ہوئے نمبر 1 بلے باز کا اعزاز اپنے نام کیا ہے۔ تازہ ترین رینکنگ کے مطابق، شبھمن گل 796 ریٹنگ پوائنٹس کے ساتھ سرفہرست ہیں، جبکہ بابر اعظم 773 پوائنٹس کے ساتھ دوسرے نمبر پر آ گئے ہیں۔ بابر کی حالیہ کارکردگی توقعات کے مطابق نہیں رہی، جس کا اثر ان کی رینکنگ پر پڑا ہے۔ دوسری جانب، شبھمن گل نے انگلینڈ کے خلاف شاندار بیٹنگ کا مظاہرہ کرتے ہوئے ایک سنچری اور دو نصف سنچریاں اسکور کیں، جس کی بدولت ان کے ریٹنگ پوائنٹس میں نمایاں اضافہ ہوا۔

قابل ذکر ہے کہ شبھمن گل نے 2019 میں ڈیبیو کیا تھا اور اس کھلاڑی نے اب تک محض 50 یک روزہ میچ کھیلے ہیں اور اتنے کم مقابلوں میں یہ ہی کھلاڑی نمبر 1 پوزیشن پر پہنچ گیا ہے۔ گل کا ریکارڈ ہی انھیں وَنڈے رینکنگ کے عرش پر پہنچاتا ہے۔ اس کھلاڑی نے 60 سے زیادہ کی اوسط سے 2587 رن بنائے ہیں، جس میں 7 سنچری اور 15 نصف سنچری شامل ہیں۔ گل نے وَنڈے کرکٹ میں ڈبل سنچری بھی لگائی ہے۔ گل یک روزہ کرکٹ میں سب سے تیزی کے ساتھ 2500 رن بنانے والے کھلاڑی بھی ہیں۔ یہی وجہ ہے کہ گل کا نمبر 1 بلے باز بننا طے مانا جا رہا تھا۔

شبھمن گل 2023 میں نومبر ماہ میں بھی وَنڈے کرکٹ میں نمبر 1 بلے باز بنے تھے، لیکن بابر نے وہ جگہ ان سے جلد ہی چھین لی تھی۔ اب ایک بار پھر یہ کھلاڑی بابر کو پیچھے کرنے میں کامیاب رہا ہے۔ ویسے اس رینکنگ پر برقرار رہنے کے لیے شبھمن گل کو چمپئنز ٹرافی میں بہترین کارکردگی کا مظاہرہ کرنا ہوگا۔ دائیں ہاتھ کا یہ بلے باز اس وقت کمال کے فارم میں دکھائی دے رہا ہے اور اگر وہ چمپئنز ٹرافی مین رنوں کا انبار لگاتے ہیں تو بابر سے بہت آگے نکل جائیں گے۔

شبھمن گل اور بابر اعظم کے علاوہ وَنڈے رینکنگ کی بات کریں تو ہندوستانی کپتان روہت شرما کو تیسرا مقام حاصل ہے۔ ہنرک کلاسین ایک مقام اوپر اٹھتے ہوئے چوتھے مقام پر آ گئے ہیں۔ نیوزی لینڈ کے ڈیرل مچیل پانچویں مقام پر پہنچ گئے ہیں۔ وراٹ کوہلی چھٹے نمبر پر اور ہیری ٹیکٹر ساتویں مقام پر قابض ہیں۔ آٹھواں مقام سری لنکائی بلے باز چرت اسالانکا کو حاصل ہے۔ ہندوستان کے ایک دیگر بلے باز شریئس ایئر بھی وَنڈے رینکنگ میں نویں مقام پر ہیں، جبکہ شے ہوپ کو دسواں مقام حاصل ہوا ہے۔