بلوچستان  ، 15/فروری (ایس او نیوز /ایجنسی)پاکستان کے بلوچستان علاقے میں دھماکوں کا سلسلہ جاری ہے، اور آج ایک بار پھر ایک زوردار دھماکہ ہوا، جس کی زد میں ایک ٹرک آ گیا۔ اس حادثے میں کم از کم 11 افراد جان سے ہاتھ دھو بیٹھے، جبکہ 7 دیگر زخمی ہو گئے۔ اطلاعات کے مطابق، یہ ٹرک کوئلہ کان کے مزدوروں کو لے جا رہا تھا، جب سڑک کنارے نصب بم پھٹ گیا، جس کے بعد علاقے میں شدید افرا تفری مچ گئی۔

ہرنئی کے ڈپٹی کمشنر حضرت ولی کاکڑ کے مطابق دھماکہ علاقہ کے ہرنئی ضلع واقع شاہراگ میں ہوا جس کی زد میں ایک چھوٹا ٹرک آ گیا۔ کاکڑ نے کہا کہ ہم نے 11 لاشوں اور 7 زخمیوں کو اسپتال بھیجا ہے۔ متاثرین کوئلہ کانوں میں کام کرتے تھے۔ پولیس کے ذریعہ دی گئی جانکاری میں بتایا گیا ہے کہ ابتدائی جانچ کے مطابق یہ دھماکہ ایک آئی ای ڈی کے سبب ہوا، جسے سڑک کنارے لگایا ہوا تھا۔ لاء انفورسمنٹ ایجنسیوں کے افسر جائے حادثہ پر پہنچے اور قصورواروں کو پکڑنے کے لیے تلاشی مہم چلائی گئی۔

بلوچستان حکومت کے ترجمان شاہد رِند نے اس حادثہ پر اپنے غم و افسوس کا اظہار کیا ہے۔ انھوں نے کہا کہ جانچ شروع کر دی گئی ہے اور ثبوت جمع کیے جا رہے ہیں۔ ابتدائی جانچ سے پتہ چلا ہے کہ دھماکہ خیز مادہ کو سڑک کے کنارے لگایا گیا تھا اور جب ٹرک وہاں سے گزرا تو اس میں دھماکہ ہو گیا۔ ابھی تک کسی بھی گروپ نے حملے کی ذمہ داری نہیں لی ہے، لیکن ماضی میں اسی طرح کے حملوں کے لیے ممنوعہ بلوچ لبریشن آرمی (بی ایل اے) کو ذمہ دار ٹھہرایا گیا ہے۔ ممنوعہ باغی گروپوں نے حال کے مہینوں میں اپنے حملے تیز کیے ہیں اور بلوچستان میں کام کر رہے سیکورٹی فورسز، سیکورٹی اداروں اور چینی شہریوں کو نشانہ بنایا گیا ہے۔