بنگلورو، 6/فروری (ایس او نیوز /ایجنسی) کرناٹک حکومت مائیکرو فائنانس کمپنیوں کو قانون کے دائرے میں لانے کی کوشش کر رہی ہے اور اس کے لیے مائیکرو فائنانس (پریوینشن آف کر سیوا ایکشن) آرڈیننس 2025 کے مسودے کو گورنر کے دفتر کو بھیج دیا گیا ہے۔ وزیر داخلہ ڈاکٹر جی پر میشور نے میڈیا سے بات کرتے ہوئے کہا کہ انہیں امید ہے کہ گورنر سے جلد ہی منظوری مل جائے گی۔ انہوں نے بتایا کہ آرڈیننس پیر کو راج بھون کو بھیجا گیا تھا اور اب گورنر واپس بنگلورو آ چکے ہیں، اس لیے اس پر جلد فیصلہ متوقع ہے۔

پر میشور نے مزید کہا کہ حکومت نے اس آرڈیننس میں خلاف ورزی کرنے والوں کے لیے سزا کی مدت بڑھا کر 10 سال قید اور 5 لاکھ روپے جرمانہ کر دیا ہے تاکہ قانون کی مؤثر عمل داری یقینی بنائی جا سکے۔ انہوں نے کہا، "ہم چاہتے ہیں کہ ان کمپنیوں کو قانون کی گرفت کا احساس ہو۔ صرف نام کی بنیاد پر قانون کا کوئی فائدہ نہیں ہوتا۔ اس لیے سزا اور جرمانے میں اضافہ کیا گیا ہے۔"

جب ان سے پوچھا گیا کہ کیا مائیکرو فائنانس کمپنیاں اس قانون کے خلاف عدالت جا سکتی ہیں، تو وزیر داخلہ نے کہا کہ حکومت نے اس پہلو کو بھی مدنظر رکھا ہے۔ انہوں نے کہا، "جب ہم نے ڈرافٹ تیار کیا تھا، تو ہم نے ان کمپنیوں کے عدالت جانے کے امکان پر غور کیا تھا۔ وزیر اعلیٰ سدارامیا نے محکمہ قانون کو احتیاطی تدابیر اختیار کرنے کی ہدایت دی تھی، اور ہم نے تمام مسائل کو ذہن میں رکھتے ہوئے مسودہ تیار کیا ہے۔"

مائیکرو فائنانس فرموں پر الزام ہے کہ وہ قرض دینے میں ریزرو بینک آف انڈیا کے رہنما خطوط پر عمل نہیں کرتیں اور ایسی عوامی خدمات فراہم کرتی ہیں جو قرض ادا کرنے سے قاصر افراد کو مزید مشکلات میں مبتلا کر دیتی ہیں۔