کولکاتا، 22/مارچ (ایس او نیوز /ایجنسی)انڈین پریمیر لیگ (آئی پی ایل) کے 18ویں سیزن کا آغاز ہفتے کو ایڈن گارڈنس اسٹیڈیم میں ہوگا، جہاں دفاعی چمپئن کولکاتا نائٹ رائیڈرز (کے کے آر) اور رائل چیلنجرز بنگلور (آر سی بی) کے درمیان زبردست مقابلہ ہوگا۔ اس میچ میں کے کے آر کی کوشش ہوگی کہ وہ آر سی بی کے خلاف فتح کے ساتھ اپنے سیزن کا آغاز کرے۔

۳؍ بار کے آئی پی ایل چمپئن کے کے آر کی قیادت کرنے والے اجنکیا رہانے خطاب کو برقرار رکھنے کی پوری کوشش کریں گے۔ ان کی ٹیم کے پاس بہت مضبوط بیٹنگ لائن اپ ہے جس میں تجربہ کار سنیل نارائن سرفہرست ہیں اور کوئنٹن ڈی کوک اپنے  شاندار فارم کو جاری رکھنے کی امید کر رہے ہیں۔ رہانے اور وینکٹیش ایّر مڈل آرڈر میں ٹیم کو استحکام فراہم کریں گے، جبکہ میچ فنشر رنکو سنگھ، آندرے رسل اور رمندیپ سنگھ ڈیتھ اوورس میں اہم کردار ادا کریں گے۔

جنوبی افریقہ کے تیز گیندباز اینریچ نورٹجے کی قیادت میں بولنگ اٹیک میں ہرشیت رانا، ویبھو اروڑہ اور ورون چکرورتی ہوں گے۔ کے کے آرکی اسپن بولنگ کی مضبوطی ٹیم کی طاقت کو ظاہر کرتی ہے، جس میں نارائن اور چکرورتی ایڈن گارڈنس گراؤنڈ پر اپنا جادو بکھیر سکتے ہیں۔

اس دوران آر سی بی کی کمان رجت پاٹیدار کے ہاتھوں میں ہوگی۔ جو اب بھی اپنی پہلی آئی پی ایل جیت کی تلاش میں ہیں۔ بنگلورو میں واقع  یہ فرنچائزی  اپنی اننگز کو آگے بڑھانے کیلئے  وراٹ کوہلی، فل سالٹ، لیام لیونگ اسٹون اور رجت پاٹیدار کی بلے بازی پر انحصار کرے گی۔ گزشتہ سیزن میں۷۴۱؍ رن  بنانے والے کوہلی اپنی بلے بازی سے شائقین کی توجہ کا مرکز بنے ہوئے ہیں۔

آر سی بی کے آل راؤنڈرس میں شمار کرونال پانڈیا، جیکب بیتھل اور ٹم ڈیوڈ اپنے دونوں شعبوں میں بہترین کارکردگی کیلئے جانے جاتے ہیں۔ اس کے علاوہ جوش ہیزل ووڈ اور بھونیشور کمار کی ٹیم میں شمولیت نے آر سی بی کی تیز گیند بازی کی دھار کو مزید تیز کر دیا ہے، جو آئی پی ایل کے افتتاحی میچ میں کے کے آر کی دھماکہ خیز بیٹنگ لائن اپ کو روکنے کی پوری کوشش کریں گے۔

 تجربہ کار فرنٹ لائن اسپنر کی عدم موجودگی مہمانوں کیلئے  چیلنجز کا باعث بن سکتی ہے۔ ایڈن گارڈنس کھیلوں کی دنیا میں اپنے ہائی اسکورنگ میچوں کیلئے  جانا جاتا ہے۔ اس گراؤنڈ میں گزشتہ سیزن میں ۲۰۰؍ رن کے ہندسے کو پار کرنے والے۸؍ اسکور دیکھنے کو ملے۔ یہ پچ بلے بازوں کیلئے  بہت سازگار ہے  حالانکہ جیسے جیسے میچ آگے بڑھتا ہے اسپنرس کو پچ سے فائدہ ملنے کی امید ہے۔ محکمۂ  موسمیات نے پیش گوئی کی ہے کہ میچ کے دوران بارش ہوسکتی ہے جس سے دونوں ٹیموں کی حکمت عملی متاثر ہوسکتی ہے۔

کے کے آر اور آر سی بی کی ٹیمیں درج ذیل ہیں:

کولکاتا نائٹ رائیڈرس: منیش پانڈے، اجنکیا رہانے (کپتان)، رنکو سنگھ، انگکرش رگھوونشی، روومن پاول، انوکول رائے، رمندیپ سنگھ، وینکٹیش ایّر، معین علی، سنیل نارائن، آندرے رسل، کوئنٹن ڈی کوک، رحمان اللہ گرباز، لونیت سسودیا، ورون چکرورتی، مینک مارکنڈے، دیبھو ارورا، ہرشیت رانا، اینریچ نورٹجے، اسپینسر جانسن، چیتن سکاریا۔

رائل چیلنجرز بنگلورو: وراٹ کوہلی، رجت پاٹیدار (کپتان)، دیودت پڈیکل، سواستیک چکارا، ٹم ڈیوڈ، کرونال پانڈیا، لیام لیونگ اسٹون، منوج بھنڈاگے، جیکب بیتھل، روماریو شیفرڈ، سوپنیل سنگھ، موہت راٹھی، فلپ سالٹ، جیتیش شرما، جوش ہیزل ووڈ، بھونیشور کمار، لونگی انگیڈی، راسخ ڈار سلام، سویش شرما، یش دیال، نوان تشار، ابھنندن سنگھ۔