واشنگٹن   ، 20/ جنوری (ایس او نیوز/ایجنسی)ڈونلڈ ٹرمپ 20 جنوری کو امریکہ کے 47ویں صدر کے طور پر حلف اٹھائیں گے، اور اس موقع پر حلف برداری کی تیاریاں عروج پر ہیں۔ تاہم، ان کے خلاف مظاہروں کا سلسلہ بھی جاری ہے۔ ہفتے کے روز واشنگٹن کی سڑکوں پر ہزاروں افراد، جن میں اکثریت خواتین کی تھی، جمع ہوئے تاکہ نئے صدر کی حلف برداری کے خلاف اپنی ناپسندیدگی کا اظہار کر سکیں۔ مظاہرین نے ٹرمپ کی پالیسیوں اور بیانات پر شدید تحفظات کا اظہار کیا۔

مظاہرین میں سے کئی نے گلابی ٹوپیاں پہن رکھی تھیں، جو 2017 میں ٹرمپ کی پہلی حلف برداری کے خلاف کیے گئے مظاہروں کی علامت سمجھی جاتی ہیں۔

فرینکلن پارک میں، مظاہرین نے بارش کے دوران جنس سے متعلق انصاف اور جسمانی خود مختاری کے حق میں ریلی نکالی۔ دیگر مظاہرین وائٹ ہاؤس کے قریب دو مختلف پارکوں میں جمع ہوئے، جہاں ایک گروپ نے جمہوریت اور امیگریشن کے مسائل پر، جبکہ دوسرا مقامی مسائل پر مظاہرے کیے۔ کچھ دیر بعد یہ لوگ لنکن میموریل کی جانب بڑھ گئے۔

اس بار مظاہرین کی تعداد 2017 کے مقابلے میں کم رہی، جس کی ممکنہ وجہ نومبر میں ہونے والے انتخابات میں نائب صدر کملا ہیرس کی شکست ہے، جو کہ خواتین کے حقوق کے لیے ایک بڑا دھچکا تھا۔

ایک خاتون مظاہرین نے میڈیا سے بات کرتے ہوئے کہا کہ وہ ’اپورشن تک رسائی‘ کے حق میں حمایت ظاہر کرنا چاہتی تھیں۔ انہوں نے مزید کہا، ’’میں ہمارے ملک کے انتخابی نظام سے خوش نہیں ہوں۔ مجھے افسوس ہے کہ ہم نے دوبارہ ایسے صدر کو منتخب کیا جو پہلے بھی ہمیں مایوس کر چکا ہے اور ہم نے کسی خاتون امیدوار کو کامیاب نہیں کیا۔‘‘

مظاہرے کے آغاز میں، ریپروڈکٹیو فریڈم فار آل کی سربراہ منی تِماراجو نے کہا، ’’آج آپ سب کا یہاں یکجہتی کے ساتھ موجود ہونا واقعی زبردست ہے۔‘‘ انہوں نے کہا کہ اچھی خبر یہ ہے کہ ٹرمپ کی جیت کے باوجود ’ابورشن‘ کے حقوق کی عوامی حمایت برقرار ہے۔ انہوں نے ’ہم اکثریت میں ہیں‘ کا نعرہ لگایا۔

ریپروڈکٹیو گروپس نے شہری حقوق، ماحولیات اور دیگر خواتین کے گروہوں کے ساتھ مل کر ٹرمپ اور ان کے ایجنڈے کے خلاف اس مارچ کا اہتمام کیا۔