نئی دہلی   ، 18/فروری (ایس او نیوز/ایجنسی )چمپئنز ٹرافی 2025 کے آغاز میں چند دن ہی باقی ہیں، لیکن اس سے پہلے پاکستان کرکٹ بورڈ (پی سی بی) کا ایک متنازع قدم سامنے آیا ہے۔ پی سی بی نے لاہور کے اسٹیڈیم میں چمپئنز ٹرافی میں شامل تمام ممالک کے پرچم نصب کیے ہیں، تاہم ہندوستانی پرچم کو نظرانداز کر دیا گیا ہے۔ عام طور پر آئی سی سی ٹورنامنٹ کے میزبان مقام پر تمام شریک ممالک کے پرچم لگائے جاتے ہیں، لیکن پی سی بی نے اس روایت کی خلاف ورزی کرتے ہوئے ہندوستانی پرچم شامل نہیں کیا، جس پر کرکٹ حلقوں میں بحث چھڑ گئی ہے۔

چمپئنز ٹرافی میں مجموعی طور پر 8 ٹیمیں حصہ لے رہی ہیں، جس میں سے 7 ممالک کے پرچم لاہور واقع قذافی اسٹیڈیم میں لگائے گئے، لیکن ہندوستانی پرچم وہاں نہیں لگایا گیا۔ سوشل میڈیا پر ایک ویڈیو وائرل ہو رہی ہے جس کے بعد اس تعلق سے تنازعہ پیدا ہو گیا ہے۔ اس حرکت کے لیے پاکستان کرکٹ بورڈ کو ہدف تنقید بھی بنایا جا رہا ہے۔

ایسا دعویٰ کیا جا رہا ہے کہ چونکہ ہندوستانی ٹیم چمپئنس ٹرافی کھیلنے کے لیے پاکستان نہیں گئی، اس لیے پی سی بی نے یہ قدم اٹھایا ہے۔ ہندوستانی ٹیم چمپئنس ٹرافی میں اپنے سبھی میچ دبئی میں کھیلنے والی ہے۔ ہندوستانی ٹیم کو پاکستان میں سیکورٹی کا خطرہ ہے، اور حکومت ہند نے ہندوستانی ٹیم کو وہاں جانے کی اجازت نہیں دی۔ یہی وجہ ہے کہ بی سی سی آئی نے پاکستان میں اپنی ٹیم بھیجنے سے انکار کر دیا۔ اس بات سے پاکستان بہت ناراض ہے، اور ممکن ہے اسی لیے اس نے ہندوستانی پرچم کو قذافی اسٹیڈیم میں نہیں لگایا۔