بھٹکل 30 جنوری (ایس او نیوز) بھٹکل کے سماجی کارکن، معروف کبڈی کھلاڑی اور کوسموس اسپورٹس سینٹر کے فعال رکن ابو فیصل محتشم (47) منگل دیر رات کو انتقال کرگئے۔ انا للہ و اناالیہ راجعون۔
انہیں لیور ٹرانسپلینٹ کے لئے سنیچر کوچینائی اسپتال لے جایا گیا تھا، جہاں منگل کو ان کا آپریشن ہوا۔ ڈاکٹروں کے مطابق آپریشن کے دوران ہی ان پر دل کا دورہ پڑگیا، البتہ 12 گھنٹوں کے آپریشن کے بعد انہیں منگل شام قریب چھ بجے آئی سی یو میں شفٹ کیا گیا تھا۔ مگر پتہ چلا ہے کہ رات دیرگئے وہ انتقال کرگئے۔
بدھ شام میت بھٹکل پہنچی، جبکہ رات دس بجے خلیفہ جامع مسجد میں ہزاروں لوگوں کی موجودگی میں نماز جنازہ ادا کی گئی اور قریبی قبرستان میں تدفین عمل میں آئی۔
مرحوم صوم و صلاۃ کے پابند، ایک بااخلاق،باکردار،نیک صفت اوردوسروں کی مدد میں پیش پیش رہنے والے انسان تھے۔ حادثوں کے موقعوں پرفوری مدد کرنے کے لئے پہنچتے تھے، زخمیوں کو راحت پہنچانے میں آگے رہتے تھے۔ مرحوم فیصل اپنے گھر میں ماں، بہنوں اوربھائیوں سمیت تمام رشتہ داروں اور دوستوں کے ہر دلعزیز شخص تھے۔
ان کے انتقال پر بھٹکل کے مختلف اداروں اور اسپورٹس سینٹروں کی طرف سے گہرے صدمے کا اظہار کیا گیا ہے اور ان کی مغفرت کے لئے دعائیں کی گئی ہیں۔ اللہ ان کی بھرپور مغفرت فرمائے اور جنت الفردوس میں اعلیٰ مقام عطا فرمائے۔ امین
