بنگلور9/ فروری (ایس او نیوز): بنیرگھٹہ نیشنل پارک میں واقع سُورنا مکھی مندر کے تالاب میں دو کالج طلبہ کے ڈوب کر ہلاک ہونے کا افسوسناک واقعہ سنیچر شام پیش آیا۔ دونوں طلبہ اپنے دوستوں کے ساتھ سیر و تفریح کے لیے یہاں آئے تھے۔

ہلاک ہونے والے طلبہ کی شناخت 20 سالہ دیپو اور یوگیشور کے طور پر ہوئی ہے، جو ہیبّاگوڈی کے قریب واقع ایک نجی کالج میں بی ایس سی فرسٹ ایئر کے طالب علم تھے۔

ذرائع کے مطابق، دیپو اور یوگیشور تین دیگر دوستوں کے ساتھ دوپہر کے وقت تالاب میں اترے۔ یوگیشور کو پانی کی گہرائی کا اندازہ نہیں تھا، جس کی وجہ سے وہ ڈوبنے لگا۔ اپنے دوست کو مشکل میں دیکھ کر دیپو نے فوراً پانی میں چھلانگ لگائی تاکہ اسے بچایا جا سکے، لیکن بدقسمتی سے دونوں ہی پانی میں ڈوب گئے۔

واقعے کی اطلاع ملتے ہی فائر بریگیڈ کے عملے نے موقع پر پہنچ کر دونوں کی لاشیں نکالیں۔

اس حادثے کے حوالے سے بنیرگھٹہ پولیس اسٹیشن میں مقدمہ درج کر لیا گیا ہے، اور مزید تحقیقات جاری ہیں۔