ڈھاکہ، 18/فروری (ایس او نیوز/ایجنسی )بنگلہ دیش میں تشدد کی صورتحال بدستور جاری ہے، لیکن حکومت کی کوشش ہے کہ عوام کا اعتماد حاصل کر سکے۔ اس مقصد کے تحت غریب خاندانوں کے لیے چلائی جانے والی راشن اسکیم کو یونس حکومت مزید وسعت دینے کی تیاری کر رہی ہے۔ خوراک اور اراضی کے مشیر علی امام مجومدار نے 17 فروری کو اس بات کی اطلاع دی کہ حکومت مارچ اور اپریل کے مہینوں میں مختلف تقاریب کے ذریعے تقریباً 7 لاکھ ٹن راشن تقسیم کرے گی۔
راشن کی تقسیم کے لیے رمضان اور عید کے وقت کا انتخاب کیا گیا ہے۔ یعنی یونس حکومت مسلم طبقہ کو فائدہ پہنچا کر انھیں خوش کرنا چاہتی ہے۔ یونس حکومت میں وزیر علی امام مجومدار نے بتایا کہ اس میں عوام کو عید کے موقع پر اضافی 10 کلو چاول دینے کا فیصلہ کیا گیا ہے۔ انھوں نے مزید کہا کہ عیدالفطر کے دوران حکومت کئی دیگر اقدام کے ساتھ ایک کروڑ کنبوں کو 10 کلو چاول مفت دے گی۔
ڈپٹی کمشنرز کی میٹنگ کے دوسرے دن وزارت برائے خوراک و اراضی کے مشیر نے کہا کہ ’فوڈ فرینڈلی پروگرام‘ کے تحت 50 لاکھ کنبوں کو 3 لاکھ ٹن چاول دیے جائیں گے، جس میں ہر کنبہ کو 5 ٹکا فی کلوگرام کی شرح سے 30 کلوگرام چاول ملے گا۔ اس کے علاوہ بنگلہ دیش ٹریڈ کارپوریشن (ٹی سی بی) کے ذریعہ سے 2 مہینوں میں ایک لاکھ ٹن چاول تقسیم کیا جائے گا، اور مزید ایک لاکھ ٹن چاول او ایم ایس (اوپن مارکیٹ سیلنگ) منصوبہ کے تحت تقسیم کیا جائے گا۔
اس درمیان پاکیزہ مہینہ رمضان کے پیش نظر خصوصی تیاریاں بھی ہو رہی ہیں۔ رمضان کے دوران خوراک کی بہتر تقسیم کے لیے مشیر نے ڈی سی کو پروگرام منظم انداز میں نافذ کرنے کی ہدایت دی ہے۔ انھوں نے کہا ہے کہ ’’خوراک کی ایک بڑی مقدار کو رعایتی شرحوں پر فروخت کیا جائے گا اور کچھ معاملوں میں رمضان کے دوران مفت دیا جائے گا۔ میں نے ڈی سی کو اس کام کو ٹھیک طریقے سے کرنے کی ہدایت دی ہے۔‘‘