کراچی   ، 22/اپر یل (ایس او نیوز /ایجنسی)پاکستان میں ایک افسوسناک سڑک حادثے میں کم از کم 20 افراد کی موت ہو گئی ہے۔ یہ حادثہ ایک وین کے گہری کھائی میں گرنے کی وجہ سے پیش آیا۔ اس حادثے میں تقریباً 30 افراد زخمی ہوئے ہیں، جنہیں فوری طور پر اسپتال منتقل کر دیا گیا ہے۔ زخمیوں میں کچھ افراد کی حالت نازک بتائی جا رہی ہے۔ اطلاعات کے مطابق مہلوکین میں خواتین اور بچے بھی شامل ہیں۔ ابتدائی تحقیقات کے مطابق حادثہ وین کی تیز رفتاری کے باعث ہوا ہے۔

یہ حادثہ پاکستان کے سندھ علاقہ میں پیش آیا۔ دمشورو ضلع میں ایک وین پہاڑی علاقوں سے گزر رہی تھی۔ وین کی رفتار بہت تیز تھی، جس کے سبب اس کا توازن بگڑ گیا اور ڈگمگاتے ہوئے گاڑی گہری کھائی میں گر گئی۔ ذرائع کے مطابق اس گاڑی میں کولہی قبیلہ کے لوگ موجود تھے۔ وین پنجاب کے لاپاری سے سندھ کے بادِن جا رہی تھی۔

اس حادثہ کی وجہ سے علاقہ میں افرا تفری کا ماحول پیدا ہو گیا۔ وین میں سوار زخمی لوگوں میں چیخ و پکار بھی مچ گئی۔ حادثہ کی خبر ملتے ہی پولیس موقع پر پہنچی اور بچاؤ ٹیم نے سبھی زخمیوں کو کھائی سے نکال کر قریبی اسپتال میں داخل کروایا۔ ڈپٹی کمشنر غضنفر قادری نے حادثہ کی جانکاری دیتے ہوئے بتایا کہ وین میں کئی مزدور بھی تھے۔ یہ سبھی بلوچستان میں گیہوں کی کٹائی کرنے گئے تھے اور وہاں سے کام پورا کر کے گھر لوٹ رہے تھے۔

بچاؤ ٹیم نے میڈیا اہلکاروں سے بات چیت میں بتایا کہ مہلوکین کی تعداد مزید بڑھ سکتی ہے۔ کئی زخمیوں کی حالت نازک بتائی جا رہی ہے۔ سبھی زخمیوں کا علاج اسپتال میں چل رہا ہے، لیکن کچھ کی حالت بہتر ہونے کی جگہ بگڑتی ہوئی محسوس ہو رہی ہے۔