منگلورو 25/دسمبر (ایس او نیوز) منگلورو انٹرنیشنل ایئر پورٹ پر ایک گجراتی طالب علم کو اس وقت گرفتار کرلیا گیا جب سیکیوریٹی چیک کے دوران اس کی جیب سے بندوق کی ایک زندہ گولی برآمد ہوئی۔

موصولہ اطلاع  کے مطابق ارجن نامی طالب علم ممبئی جانے والے طیارے میں سوار ہونے والا تھا جہاں سے اس کو راجکوٹ گجرات کے لئے ہوائی سفر کرنا تھا۔جب تلاشی کے دوران اس کی جیب سے گولی برآمد ہوئی تو سیکیوریٹی والوں نے بجپے پولیس کو اطلاع دی اور انہوں نے ارجن کوحراست میں لے لیا۔ذرائع سے ملی خبر کے مطابق ارجن میسور کے کسی کالج میں زیر تعلیم ہے اور اس کے والدین فی الحال منگلورو میں مقیم ہیں۔