نیویارک یکم جنوری(ایس او نیوز ؍آئی این ایس انڈیا)پرتگال کے سابق وزیر اعظم انٹونیو گوٹیرش نے آج یکم جنوری سے اقوام متحدہ کے سربراہ کی ذمہ داریاں سنبھال لی ہیں۔ اس موقع پر انہوں نے اپنے ایک پیغام میں کہا کہ رواں برس کے دوران اقوام عالم اور افراد امن کو ترجیح دیں۔ انہوں نے اس یقین کا اظہار کیا کہ وہ تنازعات میں الجھے ہوئے ملکوں کے درمیان تعلقات کو فروغ دینے کے لیے پُل کا کردار ادا کریں گے۔ گوٹیرش نے جنوبی کوریا کے سابق سفارت کار بان کی مون کی جگہ عالمی ادارے کے سیکرٹری جنرل کا منصب سنبھالاہے۔گوٹیرش کسی بھی ملک کے ایسے پہلے سابق سربراہِ حکومت ہیں، جو اقوام متحدہ کے سربراہ بنے ہیں۔وہ سن1995سے سن 2002تک پرتگال کے وزیر اعظم رہے تھے۔