کاروار، 15/ ستمبر (ایس او نیوز) ووٹر فہرست کی خصوصی جامع نظرثانی (ایس آئی آر) 2026 کے تحت اتر کنڑا ضلع میں میپنگ نہ ہونے اور منطقی اختلافات سے متعلق مجموعی طور پر 65,248 نوٹس جاری کیے گئے ہیں، جن میں سے 58,687 نوٹس تقسیم کیے جاچکے ہیں۔ ان میں سے 18,904 معاملات کی سماعت مکمل ہوگئی ہے، جبکہ 39,783 معاملات ابھی زیر سماعت ہیں۔

یہ اطلاع ایڈیشنل ڈپٹی کمشنر ساجد ملا نے منگل کو سیاسی جماعتوں کے نمائندوں کے ساتھ منعقدہ اجلاس کی صدارت کرتے ہوئے دی۔

انہوں نے بتایا کہ سماعت کے دوران 19 ایسے معاملات سامنے آئے جن میں متعلقہ ووٹر کی موت یا دوہری رجسٹریشن کا پتہ چلا ہے۔

اسمبلی حلقہ وار اعداد و شمار کے مطابق ہلیال میں 14,012 نوٹس میں سے 4,618 معاملات کی سماعت مکمل ہوئی۔ کاروار میں 10,446 نوٹس میں سے 3,111، کمٹہ  میں 8,344 میں سے 2,350، بھٹکل میں 13,660 میں سے 1,957، سرسی میں 8,821 میں سے 2,385 اور یلاپور میں 9,965 نوٹس میں سے 4,483 معاملات کی سماعت مکمل ہوچکی ہے۔

الیکشن کمیشن کی ہدایت کے مطابق دعوے اور اعتراضات 23 ستمبر تک داخل کیے جاسکتے ہیں، جبکہ حتمی ووٹر فہرست 27 اکتوبر کو جاری کی جائے گی۔

ساجد ملا نے بتایا کہ بزرگ شہریوں، معذور افراد، بیمار افراد اور بیرون ملک مقیم ووٹروں کو جاری نوٹس کی سماعت کے دوران ان کے بالغ اہل خانہ ان کی جانب سے حاضر ہوکر ضروری دستاویزات اور معلومات پیش کرسکتے ہیں۔

یکم اکتوبر 2026 تک 18 سال کی عمر مکمل کرنے والے اہل شہری بھی 23 ستمبر تک ووٹر فہرست میں نام درج کرانے کے لیے درخواست دے سکتے ہیں۔

19 اور 20 ستمبر کو خصوصی ووٹر بیداری مہم چلائی جائے گی۔ اس دوران متعلقہ پولنگ مراکز پر بوتھ لیول افسران صبح 10 بجے سے شام 5 بجے تک موجود رہیں گے۔ شہری نئے نام کے اندراج، نام میں تصحیح اور دیگر ضروری خدمات سے استفادہ کرسکتے ہیں۔

کرناٹک ویسٹرن گریجویٹس حلقے کے لیے نئے ووٹروں کو فارم نمبر 18 کے ذریعے ضلع کے تحصیلدار اور اسسٹنٹ الیکٹورل رجسٹریشن آفیسر کے دفتر میں درخواست جمع کرانے کی سہولت بھی فراہم کی گئی ہے۔