ناگپور، 17/نومبر(ایس او نیوز /ایجنسی) کانگریس رہنما راہل گاندھی نے ناگپور کے مشہور ’رام جی شیام جی پوہے والے‘ میں نوجوانوں کے ساتھ ایک غیر رسمی ملاقات کے دوران اہم مسائل پر بات چیت کی۔ اس ملاقات میں بے روزگاری، مہاراشٹر میں صنعتی منصوبوں کی منتقلی اور آئینی تحفظات جیسے مسائل زیرِ بحث آئے۔ گاندھی نے اس موقع پر کہا کہ مہاراشٹر کے نوجوان تبدیلی کی خواہش رکھتے ہیں اور ان کی آواز کو سننا بہت ضروری ہے۔
راہل گاندھی نے نوجوانوں کی تعلیمی صلاحیتوں کو روزگار سے جوڑنے کی ضرورت پر زور دیا اور کہا کہ ہندوستان کو ’برین ڈرین‘ سے بچانے کے لیے موثر اقدامات اٹھائے جائیں۔ انہوں نے بی جے پی حکومت پر تنقید کرتے ہوئے کہا کہ وہ اہم اداروں پر گرفت مضبوط کر رہی ہے اور آئین کو نقصان پہنچانے کی سازش کر رہی ہے۔
انہوں نے مزید کہا کہ مہاوکاس اگھاڑی حکومت نوجوانوں کی امنگوں کو پورا کرنے کے لیے پرعزم ہے۔ اس موقع پر موجود نوجوانوں نے بھی اپنے خدشات کا اظہار کرتے ہوئے کہا کہ بے روزگاری اور مواقع کی کمی ان کی سب سے بڑی پریشانی ہے۔
راہل گاندھی نے ’پوہا‘ اور گفتگو کو ’دلچسپ اور معنی خیز‘ قرار دیا۔ اس ملاقات نے نہ صرف مقامی لوگوں بلکہ سیاسی حلقوں میں بھی توجہ حاصل کی ہے۔
دریں اثنا، انہوں نے 20 نومبر کو ہونے والے مہاراشٹر کے انتخابات کے لیے چندر پور کے چمور اور امراوتی کے دھامنگاؤں ریلوے میں عوامی میٹنگیں کیں۔ راہل گاندھی نے اس ہفتے کے شروع میں ناندیڑ میں انتخابی ریلی کے بعد سڑک کے کنارے ایک دکان پر گنے کا رس پیتے ہوئے مقامی خواتین سے بات چیت کی تھی۔