کارکلا19؍نومبر(ایس او نیوز)کارکلا میں منگلا پادے مقام کے رہنے والے ایویل ڈیسوزا(24سال)کے گزشتہ 8مہینے قبل لاپتہ ہوجانے کامعاملہ پولیس نے حل کرلیا ہے اور جائداد سے متعلقہ تنازعے کی وجہ سے اپنے سگے بڑے بھائی کو قتل کرکے اس کی لاش جلادینے کے الزام میں میلوین سنتوش ڈیسوزا (13سال) کو گرفتار کرلیا ہے۔

یاد ر ہے کہ 30مارچ 2018کوگُڈ فرائیڈے کے دن اپنے گھر سے لاپتہ ہوگیا تھا۔اس تعلق سے اس کے والد البرٹ ڈیسوزا نے کارکلا پولیس اسٹیشن میں شکایت درج کروائی تھی۔پولیس تحقیقات کے دوران پتہ چلا کہ30مارچ کی رات کو 10بجے کے قریب والدین کی جائداد کے تعلق سے دونوں بھائیوں کے درمیان جھگڑا ہواتھا جس کے دوران ایویل ڈیسوزا نے پہلے میلوین پر حملہ کیا اور پھرمیلوین نے پلٹ کر لوہے کی سلاخ اور چاقو سے ایلوین پر حملہ کردیا جس کی وجہ سے موقع پر ہی اس کی موت واقع ہوگئی ۔اس کے بعدقتل کا ثبوت مٹانے کے لئے میلوین نے اپنے بھائی کی لاش کو رام سمدرانامی علاقے میں لے جاکر نذر آتش کردیا۔

کاپ پولیس اسٹیشن کی حدود میں بہترین کارکردگی دکھانے کے بعد جب پولیس سرکل انسپکٹر ہال مورتی راؤ کا تبادلہ کارکلا میں ہوا تو انہوں نے سب انسپکٹر ننجا نائیک کوساتھ لے کر ایلوین کے لاپتہ ہونے کا اپنا حل کرنے کی کوشش شروع کی۔ اس سلسلے میں جب میلوین سے سختی کے ساتھ پوچھ تاچھ کی گئی تو اس نے اپنا جرم قبول کرلیا۔اس طرح قتل اور ثبوت مٹانے کے جرم میں تعزیرات ہند کی دفعہ 302اور201کے تحت میلوین کو گرفتار کرلیا گیا ہے۔