گوہاٹی، 4 اکتوبر (ایس او نیوز): آسام کے ناگاؤں ضلع کی دو خواتین، جہاں آرا بیگم اور ممتاز بیگم، جنہیں جون میں ہندوستان-بنگلہ دیش سرحد کے راستے بنگلہ دیش بھیجا گیا تھا، کے ٹھکانے سے متعلق اب بھی ابہام برقرار ہے۔ آسام کانگریس کے صدر اور لوک سبھا میں اپوزیشن کے ڈپٹی لیڈر گورَو گوگوئی نے مرکزی وزیر خارجہ ایس جے شنکر سے مداخلت کی اپیل کرتے ہوئے دونوں خواتین کا سراغ لگانے اور انہیں ہندوستان واپس لانے کے لیے بنگلہ دیشی حکام سے سفارتی سطح پر رابطہ کرنے کی درخواست کی ہے۔ گوگوئی نے 2 اکتوبر کو جے شنکر کو خط لکھا تھا، جس کی تفصیلات 3 اکتوبر کو سامنے آئیں۔

گوگوئی کے مطابق، بگڑی گوری گاؤں کی جہاں آرا بیگم اور ڈھنگ گاؤں کی ممتاز بیگم کو 13 اور 14 جون 2026 کی درمیانی شب ہندوستانی سرحد پار کرکے بنگلہ دیش بھیجا گیا۔ دونوں خواتین کو 2019 میں ناگاؤں کے فارینرز ٹریبونل نے غیر ملکی قرار دیا تھا۔ تاہم دونوں نے اس فیصلے کو گوہاٹی ہائی کورٹ میں چیلنج کیا تھا۔ اپریل 2026 میں ہائی کورٹ نے دونوں معاملات میں ٹریبونل کے سابقہ فیصلے منسوخ کرتے ہوئے کیس دوبارہ غور کے لیے ٹریبونل کو واپس بھیج دیا تھا، کیونکہ عدالت کے مطابق اہم شواہد پر مناسب غور نہیں کیا گیا تھا۔

عدالت کی ہدایت کے بعد جہاں آرا بیگم 29 مئی اور ممتاز بیگم 30 مئی کو متعلقہ فارینرز ٹریبونل کے سامنے پیش ہوئیں۔ اس کے فوراً بعد دونوں کو حراست میں لے لیا گیا۔ گوگوئی نے اپنے خط میں الزام لگایا ہے کہ دونوں خواتین کو ٹریبونل کے تازہ فیصلے کی مؤثر نقل حاصل کرنے اور اسے گوہاٹی ہائی کورٹ میں چیلنج کرنے کا مناسب موقع نہیں دیا گیا۔

جہاں آرا بیگم کے معاملے میں گوہاٹی ہائی کورٹ کے 3 ستمبر کے تفصیلی حکم کے مطابق، انہیں 29 مئی کو فارینرز ٹریبونل کے قریب سے حراست میں لیا گیا، بعد میں ناگاؤں اور پھر متیا، گولپارہ کے ہولڈنگ سینٹر منتقل کیا گیا۔ عدالت کے ریکارڈ کے مطابق ان کے اہل خانہ کو ان کی موجودگی کا فوری علم نہیں تھا اور جب اہل خانہ نے انہیں تلاش کرنے کی کوشش کی تو انہیں مختلف مقامات پر منتقل کیا جاچکا تھا۔ عدالت کو بتایا گیا کہ 2 جون کو ٹریبونل کے فیصلے کی مصدقہ نقل کے لیے درخواست دی گئی، جو 5 جون کو فراہم کی گئی۔

عدالتی ریکارڈ کے مطابق جہاں آرا بیگم کو 3 جون کو متیا سے سری بھومی ضلع کے ایراگول ہولڈنگ سینٹر منتقل کیا گیا، جہاں وہ 4 جون سے 13 جون تک رہیں۔ 13 جون کو انہیں بارڈر سکیورٹی فورس (BSF) کے حوالے کیا گیا اور عدالت میں پیش کیے گئے BSF کے حلف نامے کے مطابق 14 جون کی رات تقریباً 12:10 بجے انہیں کالائن چیرہ کے علاقے میں گیٹ نمبر 2، بارڈر پلر نمبر 1339/MP کے راستے بنگلہ دیش بھیج دیا گیا۔

گوہاٹی ہائی کورٹ نے جہاں آرا بیگم کے معاملے میں یہ بھی نوٹ کیا کہ ان کے خلاف فارینرز ٹریبونل کی 29 مئی کی رائے کی نقل انہیں حراست میں لیے جانے کے وقت فراہم کیے جانے کا کوئی ثبوت ریکارڈ پر موجود نہیں تھا۔ عدالت نے کہا کہ اس صورت میں انہیں ہائی کورٹ سے رجوع کرنے کے لیے دستیاب قانونی راستہ مؤثر طور پر استعمال کرنے کا موقع نہیں ملا۔

ممتاز بیگم کے معاملے میں بھی تقریباً یہی صورت حال سامنے آئی۔ عدالت کے مطابق انہیں 30 مئی کو ٹریبونل کے سامنے پیش ہونے کے بعد حراست میں لیا گیا۔ وہ مختلف پولیس اسٹیشنوں اور متیا کے ہولڈنگ سینٹر سے ہوتی ہوئی سری بھومی کے ایراگول ہولڈنگ سینٹر پہنچیں، جہاں 4 جون سے 13 جون تک رہیں۔ 13 جون کو انہیں BSF کے حوالے کیا گیا اور اگلے روز کالائن چیرہ کے راستے بنگلہ دیش بھیج دیا گیا۔

3 ستمبر کو گوہاٹی ہائی کورٹ نے ممتاز بیگم کے معاملے میں فارینرز ٹریبونل کے طریقۂ کار پر سخت سوالات اٹھائے۔ عدالت نے کہا کہ ٹریبونل کے فیصلے کی مصدقہ نقل فراہم کرنے میں دانستہ تاخیر ہوئی اور اس معاملے میں "malice in law" کا عنصر نظر آتا ہے۔ عدالت نے یہ بھی کہا کہ ریاستی مشینری کے اقدامات کے نتیجے میں ممتاز بیگم کو ہائی کورٹ سے رجوع کرکے اپنے قانونی حق کو استعمال کرنے کا مؤثر موقع نہیں مل سکا۔

عدالت نے ناگاؤں کے ڈسٹرکٹ کمشنر کی جانب سے 2 جون کو جاری اس حکم پر بھی سوال اٹھایا، جس میں ممتاز سمیت خواتین کو 24 گھنٹے کے اندر ہندوستان چھوڑنے کی ہدایت دی گئی تھی، حالانکہ وہ پہلے ہی ریاستی حراست میں تھیں۔ عدالت نے اس حکم کو "farcical" قرار دیتے ہوئے کہا کہ حراست میں موجود شخص کے لیے 24 گھنٹے کے اندر خود ہندوستان چھوڑ دینا عملی طور پر ممکن نہیں تھا۔

ہائی کورٹ نے دونوں معاملات میں وزارت خارجہ کو فریق بنایا تاکہ بنگلہ دیش میں خواتین کا سراغ لگانے اور انہیں ہندوستان واپس لانے کے لیے ضروری اقدامات کیے جاسکیں۔ ممتاز بیگم کے معاملے میں عدالت نے ان کے شوہر مجمّل حق کو عبوری معاوضے کے طور پر 2 لاکھ روپے دینے کی ہدایت بھی آسام حکومت کو دی۔ عدالت نے ساتھ ہی یہ ہدایات جاری کیں کہ کسی شخص کو فارینرز ٹریبونل کی جانب سے غیر ملکی قرار دیے جانے کے بعد حراست میں لینے سے قبل اسے فیصلے سے آگاہ کیا جائے اور اسے اس کی نقل فراہم کی جائے، جبکہ ضلع سے باہر منتقل کرنے سے پہلے کسی بالغ اہل خانہ کو بھی اطلاع دی جائے۔

ممتاز بیگم کے معاملے میں بنگلہ دیشی حکام نے بھی تلاش شروع کی ہے۔ بنگلہ دیش کی وزارت داخلہ نے معاملہ پولیس اور دیگر متعلقہ محکموں کو بھیجا تھا۔ بنگلہ دیشی حکام کے مطابق سلہٹ اور آس پاس کے علاقوں میں تلاش کی گئی، لیکن 28 ستمبر تک کوئی سراغ نہیں ملا تھا۔ سلہٹ میٹروپولیٹن پولیس کمشنر نے بھی کہا تھا کہ پولیس نے سلہٹ شہر میں ممتاز کو تلاش کرنے کی کوشش کی لیکن کامیابی نہیں ملی اور تلاش جاری ہے۔ ان کی تصویر اور شناختی تفصیلات پر مشتمل اپیل 22 ستمبر کو بنگلہ اخبارات میں بھی شائع کی گئی تھی۔

اس معاملے میں اب گورَو گوگوئی نے وزیر خارجہ جے شنکر سے دونوں خواتین کا سراغ لگانے کی اپیل کرتے ہوئے کہا کہ ان کے خاندان کئی ماہ سے ان کی تلاش میں ہیں۔ انہوں نے وزارت خارجہ سے بنگلہ دیشی حکومت سے رابطہ کرنے کے ساتھ ساتھ ڈھاکہ میں ہندوستانی ہائی کمیشن اور سلہٹ میں ہندوستانی اسسٹنٹ ہائی کمیشن کو معاملے کی پیروی کرنے کی ہدایت دینے، خواتین کو مناسب قونصلر مدد اور واپسی کے لیے ضروری سفری دستاویزات فراہم کرنے اور خاندانوں کو پیش رفت سے باقاعدہ آگاہ کرنے کی درخواست کی ہے۔