کاروار، 4 دسمبر (پریس ریلیز/ایس او نیوز): ہندوستانی بحریہ کے یومِ تاسیس نیوی ڈے 2025 کے موقع پر جمعرات کو ’سمبندھ‘ (نیوی ڈے ایٹ ہوم) اور بیٹنگ ریٹریٹ کی پروقار تقریب نیوی ہاؤس کاروار میں منعقد ہوئی، جس کے مہمانِ خصوصی کرناٹک کے گورنر شری تھاور چند گہلوت تھے۔
ہر سال 4 دسمبر کو نیوی ڈے اُن بہادرانہ کارروائیوں کی یاد میں منایا جاتا ہے جو بھارتی بحریہ نے 1971 کی جنگ کے دوران کراچی بندرگاہ پر میزائل بوٹس کے ذریعے انجام دیں۔ ان کارروائیوں—آپریشن ٹرائیڈنٹ اور آپریشن پائتھن—نے نہ صرف بحریہ کی عملی صلاحیت کو ثابت کیا بلکہ بھارت کی بحری تاریخ میں ایک منفرد سنگِ میل کی حیثیت اختیار کرلیا۔ یہ دن بحریہ کے اُن افسران و جوانوں کی جرات، پیشہ ورانہ مہارت اور لازوال قربانیوں کو خراجِ عقیدت پیش کرنے کا موقع بھی ہے جنہوں نے ملک کی سمندری سرحدوں کے تحفظ میں اہم کردار ادا کیا۔
تقریب کا اہم حصہ بیٹنگ ریٹریٹ تھا، جس میں بھارتی بحریہ کے بینڈ نے دلکش فوجی اور روایتی دھنوں کی پراثر پیشکش کی۔ غروبِ آفتاب کے وقت کاروار نیول ہاربر پر لنگرانداز جنگی جہازوں کا نظارہ تقریب کو اور بھی شان و شوکت بخشتا رہا، جو وطن کی سمندری سلامتی کے لیے بحریہ کی مسلسل تیاری اور عزم کی علامت تھا۔
اس موقع پر نیوی چلڈرن اسکول کاروار کے طلبہ نے بھی خوبصورت ثقافتی پروگرام پیش کیا، جب کہ بحریہ کے کمیونٹی آرٹسٹوں کی کارکردگی نے تقریب کو رنگارنگ اور جاذبِ نظر بنا دیا۔
تقریب میں اعلیٰ بحری افسران، مرکزی و ریاستی سرکاری حکام، صنعت سے وابستہ شخصیات اور کاروار و آس پاس کے معزز شہری بڑی تعداد میں شریک تھے.