بھٹکل، 5 جولائی (ایس او نیوز): بھٹکل میں مسلسل کئی دنوں سے جاری موسلادھار بارش کا سلسلہ ہفتہ کو بھی شدت کے ساتھ جاری رہا، جس کے نتیجے میں متعدد اہم سڑکیں پانی میں بہہ گئیں۔ صبح کے وقت جب بچے اسکول جانے کی تیاری کر رہے تھے، تو تیز ہواؤں کے ساتھ شروع ہونے والی زوردار بارش نے کئی بچوں کو اسکول جانے سے روک دیا، جبکہ بعض کو بروقت پہنچنے میں شدید دقتوں کا سامنا کرنا پڑا۔
بارش کے نتیجے میں بندر روڈ سے ڈونگر پلی اور آسارکیری جانے والی سڑکیں مکمل طور پر متاثر ہو گئیں۔ یہ وہی سڑکیں ہیں جو حال ہی میں تار (دامبر) سے تعمیر کی گئی تھیں اور یو جی ڈی (UGD) کے کام کے بعد عارضی طور پر مٹی ڈال کر بحال کی گئی تھیں۔
بندر روڈ سے آسارکیری کو جوڑنے والا اے پی جے عبدالکلام روڈ پر جہاں یو جی ڈی پائپ لائن کے لیے کھدائی کے بعد مٹی بھر دی گئی تھی، شدید بارش اس مٹی کو اپنے ساتھ بہا لے گئی ہے۔ جس کی وجہ سے یہ راستہ اب ناقابلِ استعمال ہوگیا ہے۔
دوپہر کے وقت اسکول بسیں جب طلبہ کو گھروں تک چھوڑنے نکلی تھیں، تو ایک کے بعد ایک دو بسیں انہی کیچڑ زدہ راستوں پر پھنس گئیں۔ دونوں بسوں کے دائیں پہیے زمین میں دھنس گئے، جس کے باعث بسیں اُلٹنے کے قریب پہنچ گئیں۔ ڈرائیوروں نے حاضر دماغی سے بچوں کو پہلے بحفاظت باہر نکالا، پھر ایک بس کو جے سی بی اور دوسری کو لاری کی مدد سے باہر نکالا گیا۔
ایک ڈرائیور نے بتایا کہ جب وہ بندر روڈ سے آسارکیری کی طرف مڑا، تو کچھ ہی دور جا کر بس کے دونوں پہیے دھنس گئے۔ بس اُلٹنے کے قریب تھی مگر فوری قابو پانے سے بڑا حادثہ ٹل گیا۔ اس بس کو باہر نکال کر روانہ کرنے کے کچھ ہی دیر بعد دوسری اسکول بس بھی پھنس گئی، جسے تقریباً ایک گھنٹے کی جدوجہد کے بعد نکالا گیا۔
مقامی رہائشیوں نے شکایت کی ہے کہ یو جی ڈی کے کام کے بعد ان راستوں کو صرف عارضی طور پر مٹی سے ڈھانپا گیا تھا، جو تیز بارش کے پانی میں ہی بہہ گئی ہے۔ اب یہ راستے اسکول بسوں سمیت عام گاڑیوں کے لیے بھی خطرناک ہو چکے ہیں۔
لوگوں نے یہ بھی نشاندہی کی کہ مخدوم کالونی پہاڑی سے بہنے والا پانی انہی سڑکوں سے ندی کی طرف جاتا ہے، جس سے سڑکوں کی حالت مزید بگڑ گئی ہے۔ اس لیے فوری طور پر پکی اور پائیدار سڑک کی تعمیر ضروری ہے۔
عوام نے میونسپالٹی سمیت تعلقہ انتظامیہ سے مطالبہ کیا ہے کہ دونوں جگہوں پر کانکریٹ روڈ تعمیر کی جائے، تاکہ روزمرہ آمد و رفت محفوظ بنائی جا سکے۔