ہلیال، 8 جنوری (ایس او نیوز) تیز رفتار کے ایس آر ٹی سی بس ایک سواری کو اوورٹیک کرنے کے دوران اچانک سامنے سے آنے والی کار سے ٹکر سے بچنے کی کوشش میں بے قابو ہو کر سڑک کنارے درخت سے جا ٹکرائی، جس کے نتیجے میں ڈرائیور سمیت 20 مسافر زخمی ہو گئے۔ یہ حادثہ اتر کنڑا ضلع کے ہلیال تعلقہ کے بانسگیری گاؤں کے قریب جمعرات کی صبح پیش آیا۔
حادثے کے نتیجے میں بس میں سوار ایک 10 سالہ طالب علم بس کی اگلی نشستوں کے درمیان بری طرح پھنس گیا، جسے نکالنے کے لیے تقریباً ایک گھنٹے تک ریسکیو آپریشن جاری رہا۔ حادثے کے بعد سڑک پر ٹریفک بھی کچھ دیر کے لیے جام ہو گئی۔
اطلاعات کے مطابق ہلیال ڈپو کی کے ایس آر ٹی سی بس ہبلی کے کلگھٹگی سے ہلیال کی طرف جا رہی تھی۔ اوورٹیک کے دوران سامنے سے آنے والی کار سے تصادم سے بچنے کے لیے بس ڈرائیور نے اچانک بریک لگائی، تاہم وہ گاڑی پر قابو نہ رکھ سکا اور بس درخت سے ٹکرا گئی۔
حادثے کے وقت بس میں تقریباً 40 مسافر سوار تھے، جن میں 8 طالبات، 2 خواتین اور 2 اسکولی بچے شامل ہیں۔ حادثے میں مجموعی طور پر 20 افراد زخمی ہوئے، جنہیں فوری طور پر ہلیال کے سرکاری اسپتال میں داخل کرایا گیا۔
حادثے میں بس کے اگلے حصے کو شدید نقصان پہنچا، جس کے باعث جوگنکوپا گاؤں کے رہنے والے سیمنت مہانتیش کمار (10)، جو ہلیال کے ایک اسکول کا طالب علم ہے، کی ٹانگیں انجن کے حصے اور اگلی سیٹ کے درمیان پھنس گئیں۔ اطلاع ملتے ہی ریسکیو ٹیم نے گیس کٹر کی مدد سے بس کی سیٹ کے حصے کاٹ کر بچے کو بحفاظت باہر نکالا۔ خوش قسمتی سے بچے کو کوئی سنگین چوٹ نہیں آئی۔
حادثے میں بس ڈرائیور کو شدید چوٹیں آئی ہیں۔ واقعے کے سلسلے میں ہلیال پولیس تھانے میں مقدمہ درج کر لیا گیا ہے اور مزید تحقیقات جاری ہیں۔