بھٹکل، 16 فروری (ایس او نیوز): بھٹکل میں آٹو رکشا ڈرائیورس و مالکان ایسوسی ایشن کی جانب سے دباؤ اور زیادتی کے الزامات کے تحت پولیس میں دی گئی شکایات پر سخت ردِعمل ظاہر کرتے ہوئے بھٹکل ٹیکسی ڈرائیورس و مالکان ایسوسی ایشن نے ٹاؤن پولیس تھانے پہنچ کر احتجاج درج کرایا۔ اس موقع پر یونین کے عہدیداران نے پولیس انسپکٹر کو ایک تحریری عرضداشت پیش کرتے ہوئے آٹو یونین کے تمام الزامات کو بے بنیاد اور حقائق کے منافی قرار دیا۔
ٹیکسی یونین کے قائدین کا کہنا تھا کہ بھٹکل میں بعض آٹو رکشا ڈرائیور قواعد و ضوابط کی خلاف ورزی کرتے ہوئے مقررہ حد سے کہیں زیادہ فاصلے تک سواری لے جا رہے ہیں، حالانکہ آٹو رکشاؤں کی مجاز سفری حد صرف سات کلومیٹر مقرر ہے۔ ان کے مطابق حال ہی میں چند آٹو رکشا ڈرائیور کرایے پر بیندور گئے تھے، جس پر ان سے صرف وضاحت طلب کی گئی تھی۔ یونین نے واضح کیا کہ اس معاملے میں ضلع انتظامیہ کی جانب سے باضابطہ احکامات جاری ہونے تک انتظار کرنے کی گزارش کی گئی تھی۔
میمورنڈم میں کہا گیا کہ اگر آٹو رکشا ڈرائیور اچانک دور دراز علاقوں تک سواری لے جانے لگیں تو بھاری قرض لے کر ٹیکسی چلانے والے ڈرائیوروں کو شدید معاشی نقصان کا سامنا کرنا پڑے گا۔ یونین کے مطابق انہوں نے متعلقہ افراد کے سامنے محض یہ نکتہ اٹھایا تھا، نہ کسی کو ہراساں کیا گیا اور نہ ہی کسی سے زبردستی رقم وصول کی گئی۔
ٹیکسی یونین نے یہ بھی الزام عائد کیا کہ بعض رکشا ڈرائیور اپنی مبینہ غیر قانونی سرگرمیوں کو جواز فراہم کرنے کے لیے ٹیکسی ڈرائیوروں اور مالکان کے خلاف جھوٹے اور من گھڑت الزامات عائد کر رہے ہیں۔
پولیس انسپکٹر دیواکر نے عرضداشت وصول کرتے ہوئے معاملے کی جانچ کر کے مناسب کارروائی کا یقین دلایا۔ اس موقع پر ٹیکسی ڈرائیور و مالکان ایسوسی ایشن کے صدر گنیش دیواڈیگا، سکریٹری جگدیش نائک، نوین نائک کمٹہ، رمیش کوٹیاں، فیصل پیزادے سمیت دیگر متعدد اراکین موجود تھے۔
Click here for report in English
