ڈانڈیلی، 15 جنوری (ایس او نیوز): ڈانڈیلی میں بہنے والی کالی ندی میں نہانے کے دوران ایک نوجوان کی المناک موت واقع ہوگئی۔ متوفی کی شناخت ڈانڈیلی کے گاندھی نگر علاقے کے رہائشی 18 سالہ نواز کے طور پر کی گئی ہے۔

ذرائع کے مطابق، جمعرات کی دوپہر نواز اپنے دوستوں کے ساتھ مولنگی علاقے میں واقع ندی کے سنگم پر نہانے کے لیے پانی میں اترا تھا۔ اسی دوران پانی کا بہاؤ اچانک تیز ہو گیا، جس کے باعث وہ ندی میں بہہ گیا اور باہر نہیں نکل سکا، نتیجتاً اس کی موقع پر ہی موت واقع ہوگئی۔

واقعے کی اطلاع ملتے ہی پولیس نے محکمہ جنگلات، فائر بریگیڈ کے عملے اور ریسکیو ٹیموں کی مدد سے وسیع پیمانے پر تلاشی مہم شروع کی۔ ندی کی گہرائی میں کئی گھنٹوں تک جاری تلاش کے بعد شام کے وقت نواز کی لاش برآمد کر لی گئی۔

لاش کو قانونی کارروائی کے لیے پوسٹ مارٹم کے لیے بھیج دیا گیا ہے، جبکہ پولیس واقعے کی مزید جانچ کر رہی ہے۔