کولکاتا، 9/اکتوبر (ایس او نیوز /ایجنسی) مغربی بنگال کے آر جی کر اسپتال میں چند ماہ قبل ایک ٹرینی لیڈی ڈاکٹر کے ساتھ عصمت دری کے بعد قتل کے اندوہناک واقعے نے پورے ملک میں غم و غصے کی لہر دوڑا دی تھی۔ اس دردناک واقعے کے خلاف ملک بھر میں، خاص طور پر مغربی بنگال میں، بڑے پیمانے پر احتجاجی مظاہرے ہوئے تھے۔ آج بھی مغربی بنگال میں احتجاج جاری ہے، جہاں آر جی کر اسپتال کے باہر جونیئر ڈاکٹروں کی تنظیم (ڈبلیو بی جے اے ڈی ایف)  متوفی ٹرینی ڈاکٹر کے لیے انصاف اور چند اعلیٰ افسران کی برطرفی کا مطالبہ کرتے ہوئے بھوک ہڑتال پر بیٹھی ہے۔ اس دوران ایک بڑی خبر یہ ہے کہ اسپتال کے 50 سینئر ڈاکٹروں نے اجتماعی طور پر اپنے عہدوں سے استعفیٰ دے دیا ہے، جس نے معاملے کو مزید سنگین بنا دیا ہے۔

جونیئر ڈاکٹرس ہفتہ کے روز سے خاتون ساتھی کے لیے انصاف کا مطالبہ کر رہے ہیں۔ ان کے دیگر مطالبات میں ریاست کے تمام اسپتالوں اور میڈیکل کالجوں کے لیے سی سی ٹی وی، آن کال رومز اور واش رومز کے لیے ضروری انتظامات کو یقینی بنانے کے لیے ایک ٹاسک فورس کا قیام شامل ہے۔ وہ اسپتالوں میں پولیس سیکورٹی میں اضافہ کرنے، خواتین پولیس اہلکاروں کی مستقل بھرتی اور ڈاکٹروں، نرسوں و دیگر ہیلتھ ورکرز کی خالی اسامیوں کو تیزی سے پُر کرنے کا بھی مطالبہ کر رہے ہیں۔

بہرحال، آر جی کر اسپتال کے سینئر ڈاکٹرس نے بتایا کہ اجتماعی استعفے کا فیصلہ اس لئے لیا گیا ہے کیونکہ ہمارے بچوں کو بچانے اور ان کے مسائل کو حل کرنے کے لئے انتظامیہ کی طرف سے کوئی جواب نہیں ملا ہے۔ مغربی بنگال کے چیف سکریٹری منوج پنت نے پیر کو یہ یقین دلایا تھا کہ صوبہ کے میڈیکل کالجوں میں چل رہے 90 فیصد پروجیکٹس اگلے مہینے تک مکمل ہو جائیں گے۔ انہوں نے مظاہرہ کرنے والے ڈاکٹروں سے کام پر لوٹنے کی گزارش بھی کی تھی، لیکن یہ احتجاجی مظاہرہ ہنوز جاری ہے۔