وائناڈ، 10/ اگست (ایس او نیوز /ایجنسی ) وزیر اعظم نریندر مودی آج وائناڈ ، کیرالہ میں لینڈ سلائیڈنگ سے متاثرہ علاقوں کا دورہ کریں گے۔ وزیر اعظم وہاں  تباہی کا فضائی سروے کریں گے۔ قائد حزب اختلاف راہل گاندھی نے وزیر اعظم کے دورہ پر شکریہ ادا کیا ہے۔ قائد حزب اختلاف راہل گاندھی نے ٹویٹر پر پوسٹ کیا، "مودی جی، خوفناک سانحہ کا جائزہ لینے کے لیے وائناڈ جانے کے لیے آپ کا شکریہ۔ یہ ایک اچھا فیصلہ ہے۔"

قائد حزب اختلاف نے کہا کہ انہیں یقین ہے کہ جب وزیراعظم اس تباہی کو خود دیکھیں گے تو وہ اسے قومی آفت قرار دیں گے۔ وائناڈ کے اپنے دورے کے دوران، وزیر اعظم راحت اور بحالی کے کاموں کا جائزہ لیں گے اور ساتھ ہی حادثے میں بچ جانے والوں سے بات چیت کریں گے۔ خبر رساں ایجنسی پی ٹی آئی کی رپورٹ کے مطابق، وزیر اعظم صبح 11 بجے کنور پہنچیں گےاور وائناڈ میں لینڈ سلائیڈ سے متاثرہ علاقے کا فضائی سروے کریں گے۔ انہوں نے بتایا کہ بچاؤ کاموں  میں شامل ٹیمیں انہیں انخلاء کی کوششوں کے بارے میں معلومات فراہم کریں گی۔

اس کے بعد  وزیر اعظم مودی ریلیف کیمپ اور اسپتال جائیں گے، جہاں وہ لینڈ سلائیڈنگ کے متاثرین اور بچ جانے والوں سے ملاقات کریں گے۔ وزیراعظم یہاں ایک جائزہ اجلاس بھی کریں گے، جس میں انہیں اس واقعے اور امدادی سرگرمیوں کے بارے میں تفصیلی معلومات دی جائیں گی۔ اس سانحے میں 300 سے زائد افراد اپنی جانوں سے ہاتھ دھو بیٹھے اور کئی تاحال لاپتہ ہیں۔

اس ہولناک سانحہ کے بعد حزب اختلاف کے رہنما  اور وائناڈ کے سابق  رکن پارلیمنٹ  راہل گاندھی نے کانگریس جنرل سکریٹری پرینکا گاندھی کے ساتھ لینڈ سلائیڈنگ سے متاثرہ علاقوں کا دورہ کیا تھا۔ یہاں انہوں نے ریلیف کیمپوں میں لوگوں سے بھی ملاقات کی تھی۔ اس کے بعد کانگریس لیڈر راہل گاندھی نے 7 اگست 2024 کو لوک سبھا میں اس تباہی کا مسئلہ اٹھایاتھا۔ انہوں نے مرکزی حکومت سے مطالبہ کیا تھا کہ اسے قومی آفت قرار دیا جائے، لوگوں کو دیے جانے والے معاوضے میں اضافہ کیا جائے اور بحالی کا ایک جامع پیکیج دیا جائے۔