بھوپال،  20/اکتوبر (ایس او نیوز /ایجنسی) مدھیہ پردیش کے مُرینا شہر کے اسلام پور علاقے میں ایک مکان میں شدید دھماکہ ہوا جس کے نتیجے میں مکان مکمل طور پر تباہ ہو گیا۔ اس دھماکے سے اردگرد کے تین دیگر مکانات کو بھی شدید نقصان پہنچا ہے۔ حادثے کے بعد کئی افراد ملبے تلے دب گئے، جبکہ خبروں کے مطابق ایک خاتون اور ایک بچے کی موت واقع ہو چکی ہے۔ پولیس اور امدادی ٹیمیں موقع پر پہنچ چکی ہیں اور ریسکیو آپریشن میں مصروف ہیں۔

دھماکہ کی اصل وجہ کا پتہ فی الحال نہیں چل پایا ہے۔ محلہ کے کچھ لوگوں نے بتایا کہ سلنڈر پھٹنے کی وجہ سے یہ اندوہناک حادثہ پیش آیا ہے۔ کچھ لوگوں کا یہ بھی کہنا ہے کہ مکان کے اندر غیر قانونی طور پٹاخے بنائے جا رہے تھے اور اسے اسٹور بھی کیا جارہا تھا۔ اس میں آگ لگنے کی وجہ سے اتنا بڑا دھماکہ ہوا ہے۔ ملی جانکاری کے مطابق اسلام پور میں رہنے والے گجراج راٹھوڑ کے مکان میں ہفتہ کی دوپہر یہ دھماکہ ہوا جس سے ان کا مکان ملبہ میں تبدیل ہو گیا۔

دھماکہ کے بعد مکان کے ملبہ میں کچھ لوگ دب گئے۔ اس ملبہ سے ایک بچہ اور ایک خاتون کو نکالا گیا، لیکن دونوں کی ہی موت ہو چکی تھی۔ ملبہ کو ہٹانے اور اس میں پھنسے ممکنہ لوگوں کو نکالنے کی کوشش جاری ہے۔ پولیس اور میونسپل کارپوریشن کی ٹیم پوری کوشش کر رہی ہے کہ جلد از جلد راحت و بچاؤ کا کام ختم کیا جائے۔ انتظامیہ نے ایس ڈی آر ایف کی ٹیم کو بھی بلا لیا ہے۔ احتیاطاً لوگوں کو علاقہ سے باہر نکالا گیا ہے تاکہ کسی طرح کی رکاوٹ نہ ہو۔ اس حادثہ کی جانچ بھی شروع کر دی گئی ہے۔ مقامی لوگوں کا کہنا ہے کہ یہ دھماکہ اتنا تیز تھا کہ پورا محلہ دہل گیا۔ اس دھماکے کی شدت کی وجہ سے ایسا محسوس ہوا جیسے زلزلہ آ گیا ہو۔ کئی ایک مکانوں میں دھماکے کی وجہ سے شگاف بھی پیدا ہو گئے ہیں۔