دھولپور، 20/اکتوبر (ایس او نیوز  /ایجنسی) راجستھان کے دھولپور میں ایک دل دہلا دینے والا سڑک حادثہ پیش آیا، جہاں ایک سلیپر کوچ بس نے ایک ٹمپو کو شدید ٹکر ماری۔ اس حادثے میں 11 افراد جاں بحق ہو گئے، جن میں 5 بچے، 3 بچیاں، 2 خواتین اور ایک مرد شامل ہیں۔ حادثے میں 3 افراد شدید زخمی ہوئے ہیں، جنہیں فوری طور پر اسپتال منتقل کیا گیا جہاں ان کا علاج جاری ہے۔

یہ حادثہ باڑی صدر تھانہ علاقہ میں قومی شاہراہ پر سُنی پور گاؤں کے قریب ہوا۔ ٹمپو میں سوار سبھی لوگ باڑی شہر کے گومٹ محلہ کے رہنے والے بتائے جاتے ہیں۔ یہ لوگ برولی گاؤں میں اپنے رشتہ دار کے یہاں 'بھات پروگرام' میں شامل ہو کر واپس لوٹ رہے تھے۔

حادثہ میں بس کو بھی بُری طرح نقصان پہنچا ہے۔ کیونکہ جس وقت یہ حادثہ پیش آیا اس وقت اس کی رفتار کافی تیز تھی۔ ٹکر اتنی شدید تھی کہ حادثے کے بعد لوگوں کی چیخ و پکار گونج اٹھی۔ اس دوران ہائی وے سے گزر رہے لوگوں نے زخمیوں کی مدد کی اور واقعہ کی اطلاع پولیس کو دی۔ کچھ لوگ شدید طور سے زخمی تھے جنہوں نے اسپتال جاتے وقت اپنی آخری سانس لی۔  پولیس نے بس کو ضبط کر لیا ہے۔ یہ واقعہ اس وقت پیش آیا جب زیادہ تر مسافر ٹمپو میں گہری نیند میں تھے۔

سڑک حادثہ میں 14 سال کی آسمہ بیٹی عرفان عرف بنٹی، عرفان عرف بنٹی (38 سال)، سلمان (8 سال)، زرینہ (35)، آشیانہ (10)، سُکھی (7)، صانف (9) کی جائے وقوع پر ہی موت ہو گئی۔ وہیں ضلع اسپتال دھول پور ریفر کیے گئے زخمیوں میں 32 سالہ خاتون جولی، اہلیہ عرفان عرف بنٹی نے راستے میں ہی دم توڑ دیا۔ 10 سال کے ساجد کی بھی علاج کے دوران موت ہو گئی۔ وہیں حادثے میں زخمی 38 سال کے دھرمندر کو ضلع اسپتال دھول پور میں داخل کرایا گیا ہے۔