نئی دہلی، 5/اکتوبر (ایس او  نیوز /ایجنسی) میڈیا رپورٹس کے مطابق، ماہرین کا کہنا ہے کہ تہواری سیزن کے باعث ٹماٹر کی طلب میں نمایاں اضافہ ہوا ہے، جس کی وجہ سے قیمتوں میں بھی اضافہ دیکھنے کو مل رہا ہے۔ وزارت صارفین کے امور کے اعداد و شمار کے مطابق، گزشتہ ایک ماہ میں ٹماٹر کی قیمت میں 27 روپے فی کلو کا اضافہ ہوا ہے۔ دہلی میں ٹماٹر کی بڑھتی ہوئی قیمتوں نے شہریوں کو کافی مشکلات میں ڈال دیا ہے، جہاں ٹماٹر کی بڑھتی قیمت نے خریداروں کو پریشان کر دیا ہے۔

نوراتری کے تیسرے دن ملک کی راجدھانی دہلی میں ٹماٹر کی قیمتوں سے متعلق جب ٹماٹر فروشوں سے بات کی گئی تو وہ بھی مہنگائی کا رونا روتے دکھائی دیے۔ دہلی کے ماڈل ٹاؤن علاقہ میں ٹماٹر فروخ تکرنے والے خوردہ فروش پپو نے بتایا کہ ہفتہ کے روز ٹماٹر کی قیمت 100 روپے فی کلو ہے۔ ایک دن قبل یہ قیمت 80 روپے فی کلو تھی۔ ظاہر ہے 24 گھنٹے میں ٹماٹر کی قیمت دہلی میں 20 روپے فی کلوگرام تک بڑھ چکی ہے۔ پپو کا تو یہاں تک کہنا ہے کہ آنے والے دنوں میں ٹماٹر کی قیمت خوردہ بازار میں 120 روپے فی کلوگرام تک پہنچ سکتی ہے۔

آزاد پور منڈی سے ٹماٹر لا کر فروخت کرنے والے پپو کا کہنا ہے کہ منڈی سے 3 اکتوبر کو ٹماٹر 70 روپے فی کلوگرام خرید کر لائے تھے جس کی وجہ سے خوردہ قیمت 80 روپے فی کلو سے زیادہ تھی۔ ہفتہ کے روز صبح جب وہ منڈی پہنچے تو ٹماٹر کی قیمت 80 روپے فی کلوگرام ہو گئی تھی۔ ایسے میں خوردہ بازار میں ٹماٹر 100 روپے کلو فروخت کرنے پر مجبور ہونا پڑ رہا ہے۔ پپو نے امید ظاہر کی ہے کہ نوراتری کے بعد ٹماٹر کی قیمتوں میں معمولی بہتری دیکھنے کو مل سکتی ہے۔