نئی دہلی، 20/اکتوبر (ایس او نیوز /ایجنسی) مسافر طیاروں کو بم سے اڑانے کی دھمکیوں کا سلسلہ رکنے کا نام نہیں لے رہا ہے۔ ہفتہ کے روز ہندوستانی ایئرلائنس کے 30 طیاروں کو بم سے اڑانے کی دھمکیاں موصول ہوئی ہیں، جس کے نتیجے میں ایئر پورٹ اور سیکیورٹی ایجنسیوں میں افراتفری پھیل گئی ہے۔ ایئر پورٹ کے سیکیورٹی نظام کو مزید مستحکم کر دیا گیا ہے اور سیکیورٹی ایجنسیاں بھی الرٹ پر ہیں۔ میڈیا رپورٹس کے مطابق، ایئر انڈیا، انڈیگو، اکاسا ایئر، وِستارا، اسپائس جیٹ، اسٹار ایئر، اور الائنس ایئر کے طیاروں کو دھمکیاں ملی ہیں، جن میں سے کچھ کی ایمرجنسی لینڈنگ بھی کرائی گئی۔ دھمکیوں کا شکار فلائٹس میں انڈیگو کی دہلی اور ممبئی سے استنبول، جودھپور سے دہلی، اور وِستارا کی اُدے پور سے ممبئی جانے والی پروازیں شامل ہیں۔

 دبئی-جئے پور ایئر انڈیا ایکسپریس کی فلائٹ کی سنیچر کی علی الصباح جئے پور ایئرپورٹ پر ایمرجنسی لینڈنگ کرائی گئی۔ لینڈنگ کے بعد جب طیارہ کی جانچ کی گئی تو بم کی دھمکی افواہ ثابت ہوئی۔ اس طیارہ میں ۱۸۹؍ مسافر سوار تھے۔ مسافر طیاروں کو بم سے اڑانے کی لگاتار مل رہی دھمکیوں کے بعد محکمہ شہری ہوابازی اور سیکوریٹی ایجنسیاں لگاتار میٹنگیں کر رہی ہیں لیکن دھمکیوں کا سلسلہ رک نہیں رہا ہے۔

  گزشتہ دنوں طیارہ کو بم سے اڑانے کی دھمکی دینے والے ایک شخص کی گرفتاری بھی ہوئی لیکن یہ دھمکیاں الگ الگ ذرائع سے مل رہی ہیں اس لئے سیکوریٹی ایجنسیوں کو مشکلات کا سامنا کرنا پڑ رہا ہے۔ اس طرح کے بڑھتے معاملوں پر وزارت برائے شہری ہوابازی نے سخت قدم اٹھانے کی تیاری کر لی ہے۔ بتایا جاتا ہے کہ بم کی دھمکی دینے والے اشخاص کو ’نو فلائی لسٹ‘ میں ڈالا جا سکتا ہے۔ اگر ایسا ہوا تو ایسی حرکت کرنے والے افراد طیاروں میں سفر نہیں کر سکیں گے۔