بھونیشور ، 20/اکتوبر (ایس او نیوز/ایجنسی) این سی پی (اجیت پوار) کے رہنما اور سابق وزیر بابا صدیقی کے قتل کے معاملے میں لارینس بشنوئی گینگ کا نام سامنے آنے کے بعد پولیس اس کیس کی ہر زاویے سے تحقیقات کر رہی ہے۔ کچھ میڈیا رپورٹس میں یہ دعویٰ کیا گیا ہے کہ مستقبل میں اس گینگ کی جانب سے مزید بالی ووڈ اسٹارز اور سیاسی رہنماؤں کو نشانہ بنایا جا سکتا ہے۔ اس دوران اوڈیہ اداکار بدھادتیہ موہنتی پر یہ الزام عائد کیا گیا ہے کہ اس نے ایک متنازعہ پوسٹ کی ہے، جس میں اس نے لارینس بشنوئی سے راہل گاندھی کو اگلا نشانہ بنانے کا مطالبہ کیا ہے۔ اداکار کے اس متنازعہ بیان کے بعد سوشل میڈیا پر ہنگامہ برپا ہوگیا ہے۔

اس معاملے میں نیشنل اسٹوڈنٹس یونین آف انڈیا (این ایس یو آئی) نے شدید برہمی کا اظہار کرتے ہوئے متنازع پوسٹ کرنے والے اوڈیہ اداکار کے خلاف شکایت درج کرائی ہے۔ جس کے بعد پولیس نے اس معاملے میں ایف آئی آر درج کرلی ہے۔

بدھادتیہ موہنتی نے اپنے ایکس اکاؤنٹ پر پوسٹ شیئر کی ہے۔ انہوں نے اس پوسٹ میں لکھا ہے"مہاراشٹر کے سابق وزیر بابا صدیقی کے قتل کے بعد گینگسٹر لارینس بشنوئی کا اگلا نشانہ راہل گاندھی ہونا چاہیے، حالانکہ اس پوسٹ پر ہنگامہ ہونے کے بعد انہوں نے اسے ڈیلیٹ کر دیا۔ این ایس یو آئی نے اداکار کی اس حرکت پر شدید ناراضگی کا اظہار کرتے ہوئے کہا تھا کہ وہ اپنے رہنما پر اس طرح کے بیانات برداشت نہیں کریں گے۔

حالانکہ معاملے کو طول پکڑتا دیکھ اوڈیہ اداکار نے سوشل میڈیا پر معافی مانگ لی ہے۔ انہوں نے لکھا "راہل گاندھی کے بارے میں میری پچھلی پوسٹ کا مقصد انہیں نشانہ بنانا یا پھر نقصان پہنچانا یا کسی بھی طرح سے ان کی توہین کرنا نہیں تھا۔ میرا مقصد ان کے خلاف لکھنا نہیں تھا۔ اگر انجانے میں میں نے کسی کے جذبات کو ٹھیس پہنچائی ہے تو میں دل سے معافی مانگتا ہوں۔"