نئی دہلی، 24/ستمبر (ایس او نیوز /ایجنسی)سیکوریٹی اینڈ ایکسچینج بورڈ آف انڈیا (سیبی) نے انیل امبانی کے بیٹے انمول امبانی پر 1 کروڑ روپے کا جرمانہ عائد کیا ہے۔ انمول پر الزام ہے کہ ریلائنس ہوم فائنانس کو قرض فراہم کرنے کے دوران ضوابط کی پابندی نہیں کی گئی۔ سیبی کے مطابق کارپوریٹ قرض کی منظوری کے وقت ضروری جانچ پڑتال نہیں کی گئی، جس کی وجہ سے یہ کارروائی کی گئی۔ انمول امبانی کے ساتھ ریلائنس ہوم فائنانس کے چیف رِسک آفیسر گوپال کرشنن پر بھی 15 لاکھ روپے کا جرمانہ لگایا گیا ہے۔

سیبی کا کہنا ہے کہ ریلائنس ہوم فائنانس بورڈ میں کام کرنے والے انمول امبانی نے کمپنی کے بورڈ سے ایسے لون اپروولس کو روکنے کی واضح ہدایت کے باوجود کارپوریٹ قرض کو منظوری دی، مارکیٹ ریگولیٹر کے مطابق جانچ میں پتہ چلا ہے کہ 14 فروری 2019 کو انمول امبانی نے ایکورا پروڈکشنس پرائیویٹ لمیٹڈ کو 20 کروڑ روپے کا قرض منظور کیا تھا۔

خاص بات یہ ہے کہ انمول امبانی کے ذریعہ یہ قرض ایسے وقت منظور کیا گیا جبکہ تین دن قبل ہی یعنی 11 فروری 2019 کو ریلائنس ہوم فائنانس کے بورڈ نے اپنی میٹنگ میں مینجمنٹ کو کوئی بھی 'جی پی سی ایل لون' جاری نہیں کرنے کی ہدایت دی تھی۔ رپورٹ کے مطابق سیبی کے آفیشیل نوٹس میں کہا گیا ہے کہ انل امبانی کے بیٹے اور کرشنن گوپال کرشنن دونوں کو 45 دنوں کے اندر اپنے اپنے جرمانے کی ادائیگی کرنے کا حکم دیا گیا ہے۔

انمول امبانی پر جرمانے کی خبر کا اثر منگل کو ریلائنس ہوم فائنانس کے شیئر پر بھی دیکھنے کو مل سکتا ہے۔ ریلائنس ہوم فائنانس شیئر گزشتہ کچھ دنوں سے زبردست تیزی کے ساتھ بھاگ رہا ہے۔ پیر کو انل امبانی کے اس اسٹاک میں شیئر مارکیٹ میں کاروبار شروع ہوتے ہی تیزی دیکھی گئی اور یہ 4.79 فیصد کی اُچھال کے ساتھ 4.59 روپے پر کاروبار کر رہا تھا۔