اندور، 3/اکتوبر (ایس او نیوز /ایجنسی)مدھیہ پردیش کے حکام نے اندور شہر میں بھیک مانگنے والے 11 بچوں سمیت 22 گداگروں کے ایک گروپ کو ان کے آبائی مقام راجستھان واپس بھیج دیا ہے۔ سب سے حیران کن بات یہ ہے کہ یہ بھکاریوں کا گروپ ایک ہوٹل میں قیام پذیر تھا۔ خواتین اور اطفال ترقی کے ایک افسر نے بتایا کہ یہ گروپ دن بھر شہر میں مختلف مقامات پر بھیک مانگتا تھا اور شام کو ہوٹل میں واپس آجاتا تھا۔ اس گروپ میں 11 بچے اور اتنی ہی تعداد میں خواتین شامل تھیں۔

افسر نے ایک نیوز ایجنسی سے بات کرتے ہوئے کہا کہ بھیک مانگنے والوں کو آبائی ریاست واپس بھیجنے سے پہلے ان کی کاؤنسلنگ کی گئی۔ اس کے بعد شہر کے سبھی ہوٹلوں، لاج اور دیگر شیلٹروں کے مالکان کو وارننگ دی گئی ہے کہ وہ بھیک مانگنے والے لوگوں کو اپنے یہاں نہیں رکھیں، ورنہ ان کے خلاف قانونی کارروائی کی جائے گی۔

سماجی انصاف و تفویض اختیارات کی مرکزی وزارت نے ملک کے 10 شہروں کو بھکاریوں سے آزاد کرنے کے لیے ایک پائلٹ پروجیکٹ شروع کیا ہے۔ اندور بھی ان میں سے ایک شہر ہے اور مقامی انتظامیہ نے شہر میں بھیک مانگنے پر پابندی لگا دی ہے۔ اندور سے اب تک بھیک مانگنے کا کام کرنے والے 100 لوگوں کو آباد کیا جا چکا ہے۔

غور طلب رہے کہ مدھیہ پردیش کے کئی شہروں میں گداگری روکنے کے لیے بڑے پیمانے پر مہم چلائی جا رہی ہے۔ اندور، بھوپال اور گوالیار سمیت تمام شہروں میں سرکاری سطح پر یہ مہم چلائی جا رہی ہے۔ اس کا مقصد بھیک مانگنے والوں کو مین اسٹریم میں شامل کیا جانا بتایا جا رہا ہے۔ بھیک مانگنے پر روک لگانے کے لیے اندور انتظامیہ کافی سختی برت رہی ہے جس کے تحت انتظامیہ بھیک دینے والوں پر بھی کارروائی کرنے کے لیے تیار ہے۔ ساتھ ہی چوک چوراہوں پر اگر سامان بیچنے والے نابالغ سے اگر کوئی کچھ خریدتا ہے تو اس کے خلاف بھی کارروائی ہوگی۔ اس سلسلے میں اندور انتظامیہ کافی پہلے ہی حکم جاری کر چکی ہے۔