آگرہ، 13/اکتوبر (ایس او نیوز /ایجنسی) شرد پورنیما کے موقع پر جب چاند کی ٹھنڈی شعاعیں تاج محل کی پچّی کاری میں جڑے قیمتی پتھروں پر پڑیں گی، تو وہ چمک اٹھیں گے۔ تاج محل کے شائقین اس شاندار منظر کے منتظر رہتے ہیں اور اس کو دیکھنے کے لیے پورے سال بے چینی سے انتظار کرتے ہیں۔ جب قیمتی پتھر اپنی چمک بکھیرتے ہیں، تو یہ منظر دیکھنے والے سیاح ہر بار کی طرح اس بار بھی داد دیے بغیر نہیں رہ سکیں گے۔ اس سال شرد پورنیما کے دوران 15 سے 19 اکتوبر تک تاج محل کو رات کے وقت دیکھا جا سکے گا، لیکن 18 اکتوبر کو جمعہ ہونے کی وجہ سے یہ بند رہے گا اور اس رات نہیں دیکھا جا سکے گا۔
تاج محل 1984 سے قبل شرد پورنیما پر رات بھر کھلا رہتا تھا۔ اس دوران میلہ جیسا نظارہ رہا کرتا تھا۔ خاص مقبرے پر سیاحوں کے اترنے کے لیے رولنگ ہٹا کر لکڑی کے سلیپر وغیرہ سے ریمپ بنایا جاتا تھا۔ سیڑھیوں سے سیاح اوپر جاتے تھے اور ریمپ سے نیچے اترا کرتے تھے۔
ہوٹل اینڈ ریسٹورینٹ ایسو سی ایشن کے صدر راکیش چوہان کہتے ہیں کہ اس وقت تاج گنج، جمنا کنارہ روڈ اور ایم جی روڈ کے ہوٹلوں میں کمرے کم پڑنے پر ٹنٹ لگا کر روشنی کا انتظام کیا جاتا تھا۔ پولیس کی غیر مستقل چوکی بنائی جاتی تھی، جس میں سینئر افسران موجود رہتے تھے۔
تحفظاتی وجوہات سے 1984 سے 2004 تک رات میں تاج کا دیدار بند رہا۔ سپریم کورٹ کے حکم پر نومبر 2004 سے تاج محل کا رات میں دوبارہ دیدار شروع ہوا لیکن کچھ پابندیاں لگ گئیں۔ ماہ میں پورنیما پر 5 دن (پورنیما سے دو دن قبل اور اور دو دن کے بعد تک) رات میں 'تاج' دیکھا جاسکتا ہے۔
تاج محل کے سینئر کنزرویشن اسسٹنٹ پرنس واجپئی نے بتایا کہ شرد پورنیما 17 اکتوبر کو ہے۔ اس مرتبہ رات میں تاج محل دیکھنے کے دنوں میں جمعہ پڑ جانے کی وجہ سے ایک دن کم ہو کر 5 کی جگہ 4 ہو گئی ہے۔
حال میں ایک دن میں زیادہ سے زیادہ 400 سیاح تاج محل کا رات میں دیدار کر سکتے ہیں۔ 50-50 سیاحوں کے بیچ کو رات 8 بجے سے 12 بجے تک آدھا آدھا گھنٹے کے سلاٹ میں اس یادگار میں داخلہ دیا جاتا ہے۔ اس کے لیے اے ایس آئی کی ویب سائٹ سے آن لائن ٹکٹ ایک دن قبل تک بُک کی جا سکتی ہے۔ غیر ملکی سیاحوں کا ٹکٹ 750 روپے، ہندوستانی سیاح کا 510 روپے اور بچوں کا ٹکٹ 500 روپے ہے۔ مہتاب باغ واقع تاج محل ویو پوائنٹ سے بھی تاج کا رات میں نظارہ کیا جاسکتا ہے۔
تاج محل کے دیدار کے لیے ویب سائٹ پر جاکر ٹکٹ بک کر سکتے ہیں۔ asi.payumoney.com یا www.asiagracircle.in پر آپ اپنا ٹکٹ بک کر سکتے ہیں۔