تہران، 19/ مارچ (ایس او نیوز /ایجنسی) مشرقِ وسطیٰ میں ایران اور اسرائیل-امریکہ کے درمیان جاری جنگ انیسویں دن میں داخل ہو گئی ہے، جہاں اب لڑائی کا مرکز توانائی کے اہم مراکز بن چکے ہیں۔ تازہ پیش رفت میں اسرائیل نے ایران کی جنوبی پارس گیس فیلڈ پر بڑا حملہ کیا، جسے دنیا کے سب سے بڑے گیس ذخائر میں شمار کیا جاتا ہے، اور اس کے ساتھ دیگر اہم تنصیبات کو بھی نشانہ بنایا گیا۔

اس حملے کے بعد ایران نے سخت ردعمل دیتے ہوئے خلیجی خطے میں کارروائیاں تیز کر دیں اور قطر کی راس لفان انڈسٹریل سٹی میں قائم ایل این جی سہولیات پر میزائل حملے کیے۔ ان حملوں کے نتیجے میں شدید آگ بھڑک اٹھی اور بڑے پیمانے پر نقصان کی اطلاعات سامنے آئی ہیں، جس سے عالمی توانائی سپلائی کے حوالے سے خدشات میں مزید اضافہ ہو گیا ہے۔

امریکی صدر ڈونالڈ ٹرمپ نے ایک بار پھر ایران سے غیر مشروط ہتھیار ڈالنے کا مطالبہ کرتے ہوئے کہا کہ بصورت دیگر کوئی مذاکرات نہیں ہوں گے۔ انہوں نے واضح کیا کہ اس جنگ کا مقصد ایران کی بحری قوت، جوہری تنصیبات اور دہشت گرد نیٹ ورک کو مکمل طور پر ختم کرنا ہے۔

دوسری جانب اسرائیل کی جانب سے ایران کے مختلف علاقوں میں حملے جاری ہیں، جبکہ لبنان میں حزب اللہ کے زیر اثر علاقوں میں بفر زون قائم کرنے کی کوششیں بھی تیز ہو گئی ہیں۔

ایران نے ’ٹرو پرامس فور‘ آپریشن کے تحت اسرائیل پر خرمشہر چار میزائل داغے، جس کے نتیجے میں رمات گان میں دو افراد ہلاک اور متعدد عمارتیں تباہ ہو گئیں۔ اس کے ساتھ ہی متحدہ عرب امارات کی آئل فیلڈز اور آبنائے ہرمز کو بھی ڈرون اور میزائل حملوں کا نشانہ بنایا گیا ہے۔

اسی دوران سعودی عرب کے وزیر خارجہ شہزادہ فیصل بن فرحان نے ایران کو خبردار کرتے ہوئے کہا ہے کہ خلیجی ممالک اپنی سلامتی کے دفاع کی مکمل صلاحیت رکھتے ہیں اور کسی بھی حملے کا جواب دیا جائے گا۔