اُڈپی، 26 /جولائی (ایس او نیوز )  ہفتہ کی علی الصبح تقریباً 3 بجے کادیالی مہیشمارڈنی مندر کے مرکزی دروازے پر چوری کی ایک کوشش، چوکیدار کی بروقت کارروائی سے ناکام بنا دی گئی۔ چوروں نے مندر کے گیٹ کا تالا توڑنے کی کوشش کی، لیکن ڈیوٹی پر موجود چوکیدار نے انہیں للکارا تو وہ موقع سے فرار ہو گئے۔

چوکیدار نے مشتبہ حرکت دیکھتے ہی شور مچایا، جس پر چوروں نے مبینہ طور پر اسے چاقو دکھا کر دھمکایا اور موقع سے بھاگ نکلے۔ چوکیدار نے فوراً مقامی عقیدت مندوں کو اطلاع دی، جو فوراً مندر پہنچ گئے۔

مندر کے سی سی ٹی وی فوٹیج کا جائزہ لینے پر معلوم ہوا کہ واردات میں دو افراد ملوث تھے اور ان کے فرار ہونے کا راستہ بھی شناخت کر لیا گیا۔ اس معلومات کی بنیاد پر مقامی لوگوں نے تلاش شروع کی اور دونوں کو کادیالی پٹرول پمپ کے قریب گرفتار کر لیا۔

فرار کے دوران ایک چور کو اچانک دورہ پڑا اور وہ بے ہوش ہو کر گر گیا، جبکہ دوسرا بھی فرار ہونے کی کوشش میں پکڑا گیا۔ عوام نے فوری طور پر ان کے پاس موجود وہ آہنی اوزار قبضے میں لے لیے جو چوری کے لیے لائے گئے تھے، اور ابتدائی طبی امداد بھی فراہم کی۔

سماجی کارکن نیتیانندا وولکاڈو کو اطلاع ملنے پر وہ موقع پر پہنچے اور عوام کی مدد سے بے ہوش ملزم کو علاج کے لیے اجارکاڈ ضلع اسپتال منتقل کیا گیا۔ دوسرے ملزم کو پولیس کے حوالے کر دیا گیا۔

ابتدائی اطلاعات کے مطابق، دونوں ملزمان کا تعلق کیرالہ سے بتایا جا رہا ہے۔ معاملے کی مزید تفتیش جاری ہے۔

مندر کے چوکیدار کی مستعدی اور بروقت کارروائی کو مقامی لوگوں کی جانب سے خوب سراہا جا رہا ہے۔