کانو (نائجیریا)، 20 فروری (ایجنسی /ایس او نیوز): مغربی افریقی ملک نئجیریا کی شمالی ریاست کانو میں رمضان المبارک کے آغاز پر روزہ کی پابندی نہ کرنے اور دن کے اوقات میں سرِعام کھانا کھانے کے الزام میں 9 مسلمانوں کو گرفتار کر لیا گیا۔
ریاستی اسلامی پولیس فورس “حسبہ” (Hisbah)کے مطابق کارروائی شہر کے مختلف علاقوں، بازاروں اور عوامی مقامات پر کی گئی، جہاں گشت کے دوران بعض افراد کو کھاتے پیتے پایا گیا۔ گرفتار شدگان میں سات مرد اور دو خواتین شامل ہیں۔
حسبہ بورڈ کے ڈپٹی کمانڈر جنرل مجاہد امین الدین نے مقامی میڈیا کو بتایا کہ یہ اقدام رمضان المبارک کے تقدس اور عوامی نظم و ضبط کو برقرار رکھنے کے لیے کیا گیا۔ ان کے مطابق بعض گرفتار افراد نے مؤقف اختیار کیا کہ انہیں رمضان کے آغاز کا علم نہیں تھا۔
حکام کا کہنا ہے کہ تمام افراد کو حراست میں لے کر ان سے پوچھ گچھ کی گئی اور انہیں اسلامی تعلیمات کے مطابق روزے کی اہمیت سے آگاہ کیا گیا۔ ابتدائی کارروائی کے بعد انہیں تنبیہ کے ساتھ رہا کر دیا گیا، جبکہ کسی کے خلاف باضابطہ عدالتی مقدمہ درج کیے جانے کی اطلاع نہیں ہے۔
واضح رہے کہ کانو اسٹیٹ میں سن 2000ء کی دہائی کے اوائل سے شریعت قوانین نافذ ہیں، جن کے تحت حسبہ فورس سماجی و مذہبی امور کی نگرانی کرتی ہے۔ حکام کے مطابق غیر مسلم شہریوں کو روزہ رکھنے پر مجبور نہیں کیا جاتا، تاہم ان سے توقع کی جاتی ہے کہ وہ روزہ داروں کے احترام میں عوامی مقامات پر کھلے عام کھانے پینے سے گریز کریں۔
مقامی مبصرین کے مطابق رمضان کے دوران اس نوعیت کی کارروائیاں ہر سال کی جاتی ہیں تاکہ مقدس مہینے کے احترام اور مذہبی اقدار کی پاسداری کو یقینی بنایا جا سکے۔