نئی دہلی، 24/ اگست (ایس او نیوز /ایجنسی ) مرکزی حکومت نے ایک نوٹیفکیشن جاری کر 156 دواؤں پر پابندی عائد کر دی ہے۔ ان دواؤں میں بخار، سردی، الرجی اور درد کے لیے استعمال کی جانے والی اینٹی بیکٹیریل دواؤں سمیت وسیع پیمانے پر فروخت کی جانے والی 156 ’فکسڈ ڈوز کامبنیشن‘ (ایف ڈی سی) دوائیں شامل ہیں۔ وزارت مالیات کا کہنا ہے کہ ان دواؤں کے کھانے سے انسانوں کی صحت پر منفی اثر پڑ سکتا ہے۔

قابل ذکر ہے کہ ’ایف ڈی سی‘ دواؤں کو کاکٹیل دوائیں بھی کہتے ہیں۔ ان میں ایک سے زیادہ دواؤں کا مرکب ہوتا ہے۔ 12 اگست کو مرکزی وزارت صحت کے ذریعہ جاری گزٹ نوٹیفکیشن کے مطابق حکومت نے سرکردہ فارما کمپنیوں کے ذریعہ تیار درد کش دواؤں کی شکل میں استعمال کیے جانے والی مقبول مرکب دواؤں میں سے ایک ’ایسکلوفیناک 50 ملی گرام پیراسیٹامول 125 ملی گرام ٹیبلٹ‘ پر بھی پابندی عائد کر دی ہے۔

اس فہرست میں میفے نیمک ایسڈ پیراسیٹامول انجکشن، سیٹیریزن ایچ سی ایل پیراسیٹامول فینلفائن ایچ سی ایل، لیووسیٹریزن فنائلفرائن ایچ سی ایل پیراسیٹامول، پیراسیٹامول کلوروفینیرامائن میلیٹ، فنائل پروپینولامائن اور کیملوفن ڈائی ہائیڈروکلورائیڈ 25 ملی گرام پیراسیٹامول 300 ملی گرام بھی شامل ہیں۔ یہ سبھی مقبول دوائیں ہیں جس کا استعمال بڑے پیمانے پر کیا جاتا ہے۔

پابندی عائد کی گئی دواؤں میں وہ دوائیں بھی شامل ہیں جن کا استعمال بالوں کی افزائش، جِلد کی دیکھ بھال، بخار اور درد سے راحت کے لیے کیا جاتا ہے۔ ان دواؤں کو ملٹی وٹامن اور اینٹی ایلرجک کی شکل میں بھی استعمال کیا جاتا ہے۔ غور کرنے والی بات یہ ہے کہ جن دواؤں پر پابندی عائد کی گئی ہے، ان میں سے کئی دواؤں کی مینوفیکچرنگ کمپنیوں نے پہلے ہی بند کر دی ہے۔ پیراسیٹامول، ٹراماڈول، ٹارِن اور کیفین کے کامبنیشن پر بھی حکومت نے پابندی عائد کی ہے اور حکومت کا کہنا ہے کہ لوگ ان دواؤں کی جگہ دوسری متبادل دوائیں استعمال کریں۔