بنگلورو، 26/اکتوبر (ایس او نیوز )  اداکار سے سیاستدان بنے اور سابق وزیر سی پی یو گیشور نے 24 اکتوبر 2024 کو کرناٹک کے رام نگر ضلع کے چن پٹن اسمبلی حلقے کے ضمنی انتخاب کے لیے کانگریس امیدوار کے طور پر اپنے کاغذات نامزدگی داخل کرنے سے پہلے ایک روڈ شو کا انعقاد کیا۔

اس موقع پر وزیر اعلیٰ سدارامیا، نائب وزیر اعلیٰ اور کرناٹک پردیش کانگریس کمیٹی کے صدر ڈی کے شیو کمار، اور وزیر ٹرانسپورٹ را ملنگاریڈی بھی موجود تھے۔ روڈ شو کے دوران، مسٹر یو گیشور نے مسٹر سدارامیا کے ساتھ مل کر عوامی حمایت کا مظاہرہ کیا، جس میں سابق ایم پی ڈی کے سریش اور رام نگر ضلع کے دیگر قانون ساز بھی شامل تھے۔ مسٹر یو گیشور کے حامیوں کی بڑی تعداد نے روڈ شو میں شرکت کی اور کانگریس کے لیے اپنی حمایت ظاہر کی۔ وزیر اعلیٰ سدارامیا نے ضمنی انتخابات میں مسٹر یو گیشور کی کامیابی پر یقین کا اظہار کیا۔

دلچسپ بات یہ ہے کہ این ڈی اے نے ابھی تک اپنے امیدوار کا اعلان نہیں کیا ہے۔ مسٹر یو گیشور تیسری بار کانگریس کے ٹکٹ پر الیکشن لڑنے جا رہے ہیں۔ انہوں نے بی جے پی کو چھوڑ کر 24 اکتوبر کو چنا پٹنہ ضمنی انتخاب کے لیے کانگریس کے امیدوار کے طور پر نامزدگی فارم جمع کرایا۔ پانچ بار کے ایم ایل اے، مسٹر یو گیشور نے 1999 سے آزاد، کانگریس، بی جے پی اور سماج وادی پارٹی سے چنا پٹنہ حلقے سے کامیابی حاصل کی ہے۔ یہ سیٹ مرکزی وزیر ایچ ڈی کمار سوامی کے لوک سبھا انتخابات جیتنے کے بعد خالی ہوئی تھی۔