ممبئی، 26/نومبر (ایس او نیوز /ایجنسی)مہاراشٹر اسمبلی انتخابات کے نتائج کے بعد، جہاں ایک طرف مہایوتی نئی حکومت تشکیل دینے کی تیاریوں میں مصروف ہے، وہیں مہاوکاس اگھاڑی کی اتحادی جماعت شیو سینا (یو بی ٹی) نے اپنے کامیاب اراکین اسمبلی کی ایک اہم میٹنگ منعقد کی۔ اس اجلاس میں پارٹی لیڈر اور چیف وہپ کے عہدوں کے لیے انتخابات ہوئے۔ میٹنگ کے بعد شیو سینا (یو بی ٹی) کے سینئر لیڈر امباداس دانوے نے بتایا کہ ’’اجلاس میں بھاسکر جادھو کو اسمبلی میں پارٹی لیڈر اور سنیل پربھو کو چیف وہپ مقرر کیا گیا ہے۔ اس کے علاوہ آدتیہ ٹھاکرے کو شیو سینا (یو بی ٹی) کی قانون ساز پارٹی کا لیڈر منتخب کیا گیا ہے۔‘‘

ریاست میں حالیہ اختتام پذیر اسمبلی انتخاب میں مہایوتی اتحاد کو زبردست کامیابی ملی اور مہاوکاس اگھاڑی اتحاد کو ہار کا سامنا کرنا پڑا۔ مہایوتی کو 288 سیٹوں میں سے 230 سیٹوں پر ریکارڈ کامیابی ملی جبکہ مہایوتی کو صرف 46 سیٹیں ہی مل پائی ہیں۔ مہایوتی کو ملی 230 سیٹوں میں سے اکیلے بی جے پی کو 132 سیٹیں ملی ہیں جبکہ ایکناتھ شندے والی شیو سینا کو 57 اور اجیت پوار والی این سی پی کو 41 سیٹوں پر کامیابی ملی۔ مہاوکاس اگھاڑی کو مہایوتی کے مقابلہ میں کافی کم سیٹیں آئی ہیں۔ 288 سیٹوں میں سے مہاوکاس اگھاڑی کی اتحاد نے صرف 46 سیٹیں حاصل کی ہیں۔ مہاوکاس اگھاڑی میں شامل پارٹیوں میں شیو سینا (یو بی ٹی) نے 95 سیٹوں پر انتخاب لڑا تھا، محض 20 سیٹیں ہی حاصل کر پائیں۔ کانگریس نے 101 سیٹوں پر انتخاب لڑا تھا جس میں سے صرف 16 سیٹوں پر ہی کامیابی حاصل ہو پائی ہے۔ این سی پی-ایس پی نے 86 سیٹوں پر اپنے امیدوار میدان میں اتارے تھے، صرف 10 سیٹوں پر ہی کامیابی مل پائی۔

 ریاستی اسمبلی انتخابات میں مہایوتی اور مہاوکس اگھاڑی کے علاوہ کی بات کریں، تو کئی پارٹیوں نے انتخاب میں حصہ لیا تھا۔ ان پارٹیوں کو بھی کچھ نشستوں پر کامیابی حاصل ہوئی ہے۔ دیگر پارٹیوں کی بات کریں تو سماج وادی پارٹی اور جن سوراجیہ شکتی نے 2-2 سیٹیں جیتی ہیں۔ جبکہ راشٹریہ یووا سوابھیمان پارٹی، راشٹریہ سماج پکش، اے آئی ایم آئی ایم، سی پی آئی (ایم)، پی ڈبلیو پی آئی، راجرشی ساہو وکاس اگھاڑی کو 1-1 سیٹ ملی ہے۔ حالانکہ 2 نشستوں پر آزاد امیدواروں نے بھی کامیابی حاصل کی ہے۔