لکھنؤ ، 27/نومبر (ایس او نیوز /ایجنسی) اتر پردیش پولیس نے لکھنؤ کے گومتی نگر علاقے میں مختار انصاری کی بیوی افسا انصاری کی جائیداد ضبط کر لی ہے۔ یہ فلیٹ تقریباً 2 کروڑ روپے کی مالیت کا تھا اور پولیس کے مطابق، یہ جائیداد غیر قانونی طور پر حاصل کی گئی تھی۔ پولیس نے بتایا کہ یہ ضبطی کارروائی قانون کے مطابق کی گئی ہے اور فلیٹ کو غیر قانونی جائیداد کے طور پر شمار کیا جا رہا ہے۔

گومتی نگر کے وبھوتی کھنڈ میں واقع چیلسی ٹاور کے فلیٹ نمبر 1402 کو ضبط کیا گیا ہے۔ پولیس کا کہنا ہے کہ یہ فلیٹ افسا انصاری نے فلیوم پیٹرو میکس پرائیویٹ لمیٹڈ کے نام پر خریدا تھا، جو کہ ایک فرضی کمپنی تھی۔ پولیس کے مطابق، افسا انصاری اور ان کے ساتھیوں نے کئی فرضی کمپنیاں بنا کر غیر قانونی جائیدادیں حاصل کیں۔

غازی پور کے ایس پی ایراج راجہ نے بتایا کہ اس کیس کی رپورٹ کو 29 ستمبر کو تیار کیا گیا تھا اور ڈی ایم کو بھیجی گئی، جس کے بعد گینگسٹرز اینڈ اینٹی سوشل ایکٹیویٹیز ایکٹ کے تحت فلیٹ کو ضبط کرنے کا حکم جاری ہوا۔

پولیس کا کہنا ہے کہ ’’افسا انصاری اس وقت فرار ہیں اور ان کے خلاف مزید کارروائی جاری ہے۔ مختار انصاری کے خاندان کے خلاف یہ کارروائی اتر پردیش حکومت کی مجرمانہ نیٹ ورک کے خاتمے کی حکمت عملی کا حصہ ہے۔‘‘

اس سے پہلے بھی مختار انصاری کے قریبی افراد کی کئی غیر قانونی جائیدادیں ضبط کی جا چکی ہیں۔ حکومت نے گینگسٹر ایکٹ اور دیگر قانونی دفعات کا استعمال کرتے ہوئے انصاری کے خلاف سخت اقدامات کیے ہیں۔ پولیس کا کہنا ہے کہ یہ کارروائیاں مجرموں اور ان کے خاندان کے ذریعے غیر قانونی طور پر حاصل کردہ اثاثوں کو ختم کرنے کے لیے کی جا رہی ہیں۔