میسورو، 29/ جون (ایس او نیوز/ایجنسی)کرناٹک پردیش کانگریس کمیٹی (کے پی سی سی) کے صدر بی کے ہری پرساد نے الزام عائد کیا ہے کہ خصوصی نظرثانی مہم (SIR) کے نام پر اہل ووٹروں کے نام انتخابی فہرستوں سے خارج کرنے کی کوشش کی جا رہی ہے، جسے کسی بھی صورت میں قبول نہیں کیا جائے گا۔ انہوں نے کہا کہ کانگریس ووٹر فہرستوں کی نظرثانی کی مخالف نہیں، لیکن حقیقی اور اہل ووٹروں کے حقوق سلب کرنے کی ہر کوشش کا بھرپور مقابلہ کیا جائے گا۔

وہ اتوار کو میسورو میں منعقدہ ایس آئی آر عوامی بیداری اجلاس سے خطاب کر رہے تھے۔

بی کے ہری پرساد نے کہا کہ میسورو سماجی انصاف اور جمہوری اقدار کی تاریخی سرزمین ہے، جہاں نالوادی کرشن راجا ووڈیار نے پسماندہ طبقات، دلتوں، خواتین، اقلیتوں اور قبائلی برادریوں کی تعلیم اور سماجی ترقی کے لیے مثالی اقدامات کیے تھے۔ انہوں نے کہا کہ اسی تاریخی سرزمین سے ووٹروں کے حقوق کے تحفظ کی عوامی تحریک کا آغاز ایک علامتی اہمیت رکھتا ہے۔

انہوں نے کہا کہ آزادی سے قبل صرف جاگیرداروں، دولت مندوں اور ٹیکس ادا کرنے والوں کو ووٹ دینے کا حق حاصل تھا، لیکن آئین ہند نے ہر بالغ شہری کو بلاامتیاز مذہب، زبان، ذات، جنس یا معاشی حیثیت ووٹ کا مساوی حق دیا۔ ان کے مطابق یہی آئینی حق آج خطرے میں ہے۔

کے پی سی سی صدر نے الزام لگایا کہ آر ایس ایس اور بی جے پی ایس آئی آر کے ذریعے اہل ووٹروں کے نام فہرستوں سے حذف کرانے کی کوشش کر رہی ہیں اور الیکشن کمیشن بھی اس عمل میں ان کا ساتھ دے رہا ہے۔ انہوں نے واضح کیا کہ کانگریس صرف ان افراد کے نام حذف کرنے کی حامی ہے جو فوت ہو چکے ہوں یا جن کے نام ایک سے زیادہ مقامات پر درج ہوں، لیکن کسی بھی حقیقی ووٹر کا نام فہرست سے نکالنے کی اجازت نہیں دی جائے گی۔

انہوں نے کانگریس کارکنوں سے اپیل کی کہ وہ ایس آئی آر کے عمل کو "دوسری تحریکِ آزادی" تصور کرتے ہوئے گھر گھر جائیں، عوام میں بیداری پیدا کریں اور اس بات کو یقینی بنائیں کہ کوئی بھی اہل ووٹر اپنے آئینی حق سے محروم نہ ہو۔

بی کے ہری پرساد نے دعویٰ کیا کہ لوک سبھا میں قائد حزب اختلاف راہل گاندھی نے بنگلورو، مہاراشٹر اور دیگر مقامات پر مبینہ "ووٹ چوری" کے الزامات شواہد کے ساتھ اٹھائے ہیں۔ انہوں نے یہ بھی کہا کہ مرکزی وزیر خزانہ نرملا سیتارامن کے شوہر پرکالا پربھاکر نے بھی مہاراشٹر کے انتخابی عمل سے متعلق سنگین سوالات اٹھائے ہیں۔

انہوں نے الزام لگایا کہ بی جے پی عوامی مسائل سے توجہ ہٹانے کے لیے مذہبی اور نفرت کی سیاست کر رہی ہے اور مختلف ریاستوں کے بعد اب کرناٹک میں بھی ایس آئی آر کے ذریعے انتخابی عمل کو متاثر کرنے کی کوشش کی جا رہی ہے۔ بی کے ہری پرساد نے کہا کہ ووٹ کا حق ہر شہری کا سب سے طاقتور جمہوری ہتھیار ہے، اس لیے اس کے تحفظ کے لیے سب کو متحد ہو کر جدوجہد کرنی ہوگی۔ انہوں نے کارکنوں سے گھر گھر جا کر عوام کو بیدار کرنے اور ہر اہل ووٹر کا نام انتخابی فہرست میں برقرار رکھنے کی اپیل کی۔