دبئی، 28 جنوری (ایس او نیوز): بی پی ایل ٹی ٹوئنٹی کرکٹ ٹورنامنٹ کے گیارہویں ایڈیشن میں نوائط کرکٹرز دبئی (این سی ڈی) اسمیشرز نے رائزنگ اسٹارس کو پانچ وکٹوں سے شکست دے کر فائنل مقابلہ اپنے نام کر لیا، جبکہ رائزنگ اسٹارس کو دوسرے مقام پر اکتفا کرنا پڑا۔
دبئی کے قریب شارجہ-زید روڈ پر واقع جے ایم آر اسٹیڈیم میں گزشتہ پانچ اتوار کو کھیلے گئے جان اینڈ بروس بھٹکل پریمیئر لیگ (بی پی ایل) کرکٹ ٹورنامنٹ میں آٹھ ٹیموں نے حصہ لیا۔ این سی ڈی اسمیشرز نے ٹورنامنٹ کے ہر مرحلے میں شاندار کھیل کا مظاہرہ کرتے ہوئے فائنل میں بھی بہترین کارکردگی دکھائی اور کامیابی حاصل کی۔
اتوار 26 جنوری کو کھیلے گئے فائنل میچ میں رائزنگ اسٹارس نے ٹاس جیت کر پہلے بلے بازی کا فیصلہ کیا، جو ابتدا میں درست ثابت ہوتا نظر آیا۔ افتتاحی بلے باز سید افضان اور عمران خطیب نے دھواں دار بلے بازی کا مظاہرہ کرتے ہوئے ٹیم کے لیے مضبوط بنیاد فراہم کی۔ دوسرے اوور میں عمران خطیب نے مسلسل تین چھکے لگائے، جس سے ایسا محسوس ہوا کہ رائزنگ اسٹارس ایک بڑا اسکور کھڑا کرنے میں کامیاب ہو جائے گی۔ تیسرے اوور میں سید افضان کے بلے سے بھی رنز کی برسات جاری رہی، لیکن چوتھے اوور میں عمران خطیب (13 گیندوں پر 26 رنز) عبدالواسع کے ہاتھوں کیچ آؤٹ ہو گئے۔
اس کے بعد نُمیر ساوڑا میدان میں آئے، لیکن ساتویں اوور میں خلیل گولٹے نے انہیں پویلین واپس بھیج دیا۔ دسویں اوور میں اسماعیل خان نے بہترین گیند بازی کرتے ہوئے خطرناک بلے باز سید افضان (29 گیندوں پر 42 رنز) کو بولڈ کر دیا۔ مروان شانو (32) اور عبدالخالق (22) کے آؤٹ ہونے کے بعد ٹیم کی بیٹنگ لائن اپ بکھر گئی، اور 19.4 اوورز میں 168 رنز پر آل آؤٹ ہو گئی۔
15 ڈگری درجہ حرارت کی سردی اور سینکڑوں شائقین کرکٹ کی موجودگی میں جب این سی ڈی اسمیشرز کے بلے باز میدان میں اُترے تو ایک طرف سرفراز جوکاکو نے محاذ سنبھالا تو دوسری طرف اسماعیل خان نے اپنے بلے کا کمال دکھانا شروع کردیا۔ پہلے ہی اوور میں اسماعیل خان نے دو گیندوں کو باونڈری کا راستہ دکھاتے ہوئے اپنےخطرناک عزائم سے مخالف ٹیم کو آگاہ کرایا۔ تیسرے اوور کی پہلی گیند پر جب اسماعیل خان نے چھکا لگاتے ہوئے گیند کو میدان کے باہر پھینکا تو تیسری ، پانچویں اور چھٹی گیندوں پر سرفراز جوکاکو نے چوکوں پر چوکے لگاتے ہوئے شائقین کرکٹ کو زبردست تفریح فراہم کرنے میں کامیاب رہے۔آٹھویں اوور پر جب اسماعیل خان38 گیندوں پر 63 رن بناکر آوٹ ہوئے تو این سی ڈی اسمیشرز 92 رن بناکر کامیابی کی طرف گامزن ہوچکی تھی۔سرفراز جوکاکو نے بھی 17 گیندوں پر 33 رن بناتے ہوئے ٹیم کی جیت میں اہم رول ادا کیا۔ان کےبعد محمد صفوان شانو(28) اور عبدالوصی عیدروسہ (19) نے مورچہ سنبھالا اور ٹیم کو جیت دلاکر ہی دم لیا۔ اور17ویں اوور میں ہی 5 وکٹوں کے نقصان پر 172 رنز بنا کر ٹیم کو فتح دلائی۔
اعزازات کی تقسیم:
این سی ڈی اسمیشرز کو اول مقام کے ساتھ 8888 درہم نقد اور ٹرافی دی گئی، جبکہ رائزنگ اسٹارس کو رنرز اپ کے طور پر 6666 درہم نقد اور ٹرافی سے نوازا گیا۔
پلیئر آف دی ٹورنامنٹ: اسماعیل خان (227 رنز اور 6 وکٹیں)
مین آف دی فائنل: اسماعیل خان
بیسٹ بولر: عبدالباسط معلم (10 وکٹیں، 6.89 کی اوسط)
بیسٹ بیٹسمین: سرفراز جوکاکو (181 رنز)
خصوصی انتظامات اور تقریب:
فائنل تقریب میں بی پی ایل کمیٹی کے چیئرمین یاسر قاسمجی، دبئی جماعت کے دیگر ذمہ داران، اور سرگرم اراکین موجود تھے۔ چونکہ شارجہ کا جے ایم آر اسٹیڈیم دبئی الراس سے تقریباً 65 کلومیٹر دور ہے، عوام کو میچ سے محظوظ کرنے کے لیے خصوصی بس سروس فراہم کی گئی تھی۔