بدایوں، 31/اکتوبر (ایس او نیوز /ایجنسی)اتر پردیش کے بدایوں کے مُجریا علاقے میں جمعرات کی صبح بدایوں-دہلی شاہراہ پر ایک دردناک سڑک حادثہ پیش آیا جس میں دیوالی منانے گھر آ رہے 6 افراد جاں بحق ہو گئے۔ حادثے میں 5 دیگر شدید زخمی ہیں، جن کی حالت تشویشناک بتائی جا رہی ہے۔

پولیس نے اس کی اطلاع دیتے ہوئے بتایا کہ سبھی نوئیڈا سے ایک لوڈر میں بیٹھ کر اُجھانی واقع اپنے گاؤں جا رہے تھے۔ پولیس نے ذرائع کے حوالے سے جانکاری دی کہ صبح تقریباً 7 بجے لوگوں کو سوار کیے لوڈر گاڑی جب مُجریا قصبہ کے قریب پہنچا تبھی گاؤں سے آ رہے ایک ٹریکٹر ٹرالی سے اس کی زوردار ٹکر ہو گئی۔ اسی درمیان ایک تیز رفتار کار نے بھی لوڈر کو پیچھے سے ٹکر مار دی اور ڈیوائڈر سے جا ٹکرائی۔

چشم دیدوں کے مطابق لوڈر کی ٹکر پہلے گاؤں کی روڈ سے اچانک نکل کر شاہراہ پر آئے ٹریکٹر ٹرالی سے ہوئی تھی اس کے بعد کار نے ٹیمپو کو ٹکر مار دی۔ اس حادثے میں 6 لوگوں کی جانیں چلی گئیں جس میں ایک حاملہ خاتون بھی شامل ہے۔حادثہ کے بعد ضلع مجسٹریٹ ندھی شریواستو اور سینئر ایس پی برجیش سنگھ موقع پر پہنچے۔ اس دردناک حادثہ کے بعد موقع پر اتنا خون اور گوشت کے لوتھڑے سڑک پر پھیل گئے تھے کہ پولیس نے پوال سے اسے چھپایا۔

ہلاک شدگان میں ضلع بریلی کے تھانہ بھمورا علاقہ کے گاؤں ککری باشندہ کنہئی اپنی بیوی کسم اور چھ سالہ بیٹے کارتک اور سات سالہ بیٹی سینو کے ساتھ نوئیڈا میں کام کرتے تھے۔ وہیں ضلع کے اُجھانی تھانہ حلقہ کے گاؤں مرزاپور باشندہ اتل و اسی گاؤں کے کپتان سنگھ اپنی اہلیہ پان کماری کے ساتھ رہ کر کام کرتے تھے۔

حادثہ کی اطلاع ملتے ہی مُجریا تھانہ پولیس موقع پر پہنچی اور سبھی زخمیوں کو بلسی سے ایس سی راجدھانی سی ایس سی میں بھرتی کرایا گیا جہاں سے سبھی کو ضلع اسپتال ریفر کر دیا گیا ہے۔ یہاں ڈاکٹروں نے 6 کو مردہ قرار دے دیا جس میں کنہئی کا پورا کنبہ شامل ہے۔