بھٹکل میں کار اور لاری کی ٹکر؛ ایک خاتون ہلاک، دو زخمی
بھٹکل 17/اکتوبر (ایس او نیوز) ایک خاتون ہلاک ، دیگر دو زخمی ہوگئے جب ایک کار جن میں یہ تینوں سوار تھے مخالف سمت سے آنے والی ایک لاری سے ٹکراگئی۔ حادثہ موڈ بھٹکل بائی پاس بریج کے قریب نیشنل ہائی وے 66 پر منگل صبح قریب چھ بجے پیش آیا۔
مہلوک کی شناخت ریتا ڈی سوزا (51) کے طورپر کی گئی ہے جو اپنے شوہر زیویر راج ڈیسوزا اور اپنی بیٹی اِنیرکاڈیسوزا کے ساتھ اُڈپی سے گوا جارہی تھی، بھٹکل ہائی وے پر ان کی کار مخالف سمت سے آنے والی ایک لاری سے ٹکراگئی۔
ٹکر میں تینوں شدید زخمی ہوئے تھے ، مقامی لوگوں نے تینوں کو فوری بھٹکل سرکاری اسپتال پہنچایا، مگر پتہ چلا ہے کہ اسپتال پہنچنے سے پہلے ہی ریتا زخموں کی تاب نہ لاکر چل بسی۔ ان تینوں کا تعلق اُڈپی کے بیلور دیہات سے بتایا گیا ہے۔
نعش بھٹکل سرکاری اسپتال کے مردہ خانہ میں رکھی گئی ہے۔پوسٹ مارٹم کے بعد لواحقین کے حوالے کی جائے گی۔
بھٹکل ٹاون پولس تھانہ میں معاملہ درج کیا گیا ہے۔
